Мухбири СССР дирӯз зимни сафари кории худ ба деҳоти дурдаст ва наздимарзии Шулуми ш. Турсунзода ба хонаи марҳум Аслиддин Шоимов, чӯпоне, ки бегоҳи 15.04.2017 ҳангоми чаронидани чорво дар ҳудуди наздимарзӣ бо Ӯзбекистон аз тарафи марзбонони ин кишвар парронда шуд, омада ба аҳли оилаи марҳум аз номи ҳайати эҷодии газетаи мардумии СССР арзи тасаллият намуд.
Падару модари Аслиддин ҳарду нафақахӯр буда аз фарзандашон, ки соли таваллудаш 1991 буд, 2 фарзанд - яке 3 солаву дигаре 1 сола боқӣ мондааст.
Дар баробари ин раиси ш. Турсунзода Сиҷоуддин Саломзода ва дигар масъулини шаҳр, ки бо сафари корӣ, боздид ва ошноӣ бо мушкилоти мардуми деҳаҳои дурдасти наздимарзӣ ба деҳоти Шулум омада буданд, ба хонаводаи марҳум изҳори ҳамдардӣ намуда аз ҷониби Ҳукумати шаҳр ба ин оилаи ниёзманд кӯмаки хайриявии озуқа, доруворӣ ва пулӣ низ карданд.

СССР

Дирӯз, 16 май, соати 10:10 дақиқа, дар ҳудуди шаҳри Қурғонтеппа ронандаи мошини тамғаи «Опел астра» (рақ.дав. ЕО 48-27 рт 01) Тӯхтаев Одилҷон (с.тав.1988), сокини н.Вахш, ҳангоми ҳаракат аз тарафи майдони И.Сомонӣ ба самти терминали мусофиркашонии «Сафарка» мошинро бо суръати баланд ронда, дар рӯбарӯи Кохи «Лоҳутӣ» пиёдагард Эгаҳмадов Файёз-сокини ш.Қурғонтеппа, хонандаи синфи 7-ро пахш мекунад. Инчунин, мошини Одил ба 1 мошини дигари роҳ, ки ба Сафаров Каврак-сокини н.Бохтар тааллуқ дорад, бармехӯрад. Мошини Каврак ин замон аз самти майдони И.Сомонӣ ҳаракат мекард. Дар натиҷа Файёз ба беморхонаи клиникии ба номи Бурӣ Воҳидов бистарӣ мешавад.

Баҳодур Уроқов СССР вилояти Хатлон

Вазири корҳои дохилии ҶТ, генерал-лейтенанти милитсия Раҳимзода Рамазон Ҳамро бо супориши Президенти Ҷумҳурии Тоҷикистон Эмомалӣ Раҳмон ба шаҳри Сочи рафта бо роҳбарони диаспораҳои тоҷикон дар Федератсияи Россия вохӯрӣ доир намуд.
Бино ба иттиллои маркази матбуоти ВКД ҶТ, дар вохӯрии мазкур зиёда аз 60 намояндагони диспораҳои тоҷикон аз вилоятҳо ва шаҳрҳои Россия иштирок намуда,бо Рамазон Раҳимзода оид ба авфи муҳоҷиратӣ – расмикунонии будубоши муҳоҷирони меҳнатӣ ва муҳайё кардани шароитҳо, ки имрӯз фароҳам оварда шудааст, сӯҳбат намуданд,
Дар вохӯрӣ роҳбарони диаспораҳои тоҷикони Федератсияи Россия проблемаю мушкилоти муҳоҷирони меҳнатӣ-шаҳрвандони Ҷумҳурии Тоҷикистонро, ки дар Федератсияи Россия ба кору фаъолият машғуланд, ба вазири корҳои дохилӣ иброз намуданд.

СССР

Дар ин бора Абдураҳмон Қодирӣ, раиси вилояти Суғд дар 1 ҷаласаи фаъолон дар ш. Панҷакент иттилоъ дод. Ҳамчунин Абдураҳмон Қодирӣ  аз рафти кори сохтмонии маркази фарҳангӣ дидан карда, гуфт, ки дар Соли ҷавонон то ҷашни Истиқлолияти мамлакат ин маҷмаа ба истифода дода хоҳад шуд ва муҷассамаи Лоиқ Шералӣ, ки дар паҳлӯи ин бино ҷойгир аст бо тарҳи нав азнавсозӣ карда мешавад. Маблағи навсозии муҷассамаи Лоиқ Шералӣ аз ҳисоби буҷаи вилоят сурат мегирад, гуфт ҷаноби Абдураҳмон Қодирӣ.
Хабари азнавсозии пайкараи ин шоири шинохта дар ҳолест, ки санаи 20-уми май  76 солагии зодрӯзи Лоиқ дар кишвар ҷашн гирифта мешавад.

Хуршед Фозилов, СССР, водии Зарафшон

Тибқи овозаҳо, Маъруф Маҳмудзода директори генералии «Фурудгоҳи байналмилалии Қӯрғонтеппа» баъди тафтишоти пурзӯре гӯиё истеъфо додааст.
Вале Бекмурод Тағаймуродов сардори ситоди фурудгоҳи Қурғонтеппа имрӯз 15 май дар сӯҳбати хабарнигори СССР гуфт, ин овозаҳо  асос надоранд ва ягон хел тафтишот нагузашта буд. Гендиректор бо ихтиёри  худ аризаи истъфо навишт. Масъулони фурудгоҳ авомили истеъфо рафтани Маъруф Маҳмудзодаро намедонанд вале гуфтанд, ки номбурда ҳоло дар Хуҷанд аст. Дар ҳамин маврид  ҳоло иҷрокунандаи директори генералии фурдгоҳ муовинаш Абдурашидов Фарҳод таъиш шудааст.
Маҳмудзода то моҳи феврали соли 2016 ҳудуди 6 сол Директори генералии «Фурудгоҳи байналмилалии Хуҷанд» буд ва бо қарори ҳукумат 22-юми феврали соли гузашта директори генералии «Фурудгоҳи байналмилалии Қӯрғонтеппа» таъин гардид. Далели аз кор рафтани Маҳмудзода то ҳол шарҳ дода нашудааст. Воқеан ҳам ин амал аз ангуштшумор амалҳои ба истеъфо рафтани сарварони корхонаҳо дар Ҷумҳурии Тоҷикистон  аст

Баҳодур Уроқов
СССР вилояти Хатлон

Ҷинояткорон ба тани лейтенант Юноев Муҳиддин, афсари Кумитаи амнияти миллии гурӯҳи шаҳру навоҳии минтақаи Кӯлоб 24 корд задаанд...

Тибқи чорабиниҳои мувофиқашудаи Муассисаи давлатии «Раёсати сохтмон, азнавсозӣ ва таъмири роҳу кӯ прукҳои шаҳри Душанбе»-и Мақомоти иҷроияи ҳокимияти давлатии ш. Душанбе ҷиҳати муваққатан аз соати 800 рӯзи 15 то соати 800 рӯзи 16.05. 2017 қатъ намудани интиқоли оби нӯшокии қубури қутраш 325 мм, воқеъ дар х.Ҷ. Расулов тасдиқ карда шуда ҳамзамон дар ҷараёни пайваст намудани қубурҳои амалкунанда, воқеъ дар х. Ҷ. Расулов, интиқоли оби нӯшокӣ ба қисматҳои алоҳидаи маҳаллаҳои аҳолинишини ноҳияи Сино, хиёбонҳои Ҷ. Расулов, С. Шерозӣ, кӯчаҳои Маяковский, Шерализода, Абдулобеков, шаҳракҳои 15, 15а ва 32 қатъ мегардад.
 Аз об истифодабарандагони хиёбону кӯчаю шаҳракҳои зикргардида хоҳиш карда мешавад, ки миқдори лозимаи оби нӯ шокиро барои 1 шабонарӯз захира намоянд.

СССР

Рӯзи 19.01.2017 дар шаҳри Тел-Авиви кишвари Исроил қалби яке аз сарсупурдагони роҳи ҳунар, санъаткори маъруф, Ҳунарпешаи халқии Тоҷикистон Борис Наматиев дар синни 86 аз таппиш бозмонд. Борис Наматиев бештар аз 40 соли ҳаёти эҷодии хешро содиқона ва ошиқона ба саҳнаи Театри давлатии академии драмавии ба номи А.Лоҳутӣ бахшидааст. Соли 1947 ба ҳайси мутриби оркестри созӣ ба ҳайати эҷодии театр шомил шуда, фаъолияти актёрии худро аз с.1948 бо иҷрои нақши Саидризо дар намоиши “Шаби 28”-и Ҷ.Икромӣ оғоз кард. Дар тӯли фаъолияти эҷодии худ Наматиев дар саҳнаи театри ба номи А.Лоҳутӣ бештар аз 40 нақш бозидааст: Аскар (“Оршин мол-олон”-и Ӯ.Хоҷибеков), Мулло Бурҳон (“Духтари ноком”-и Икромӣ), Толиб (“Дил-дили Зайнаб”-и Ш.Қиём ва А.Мороз), Эдгар (“Шоҳ Лир”-и У.Шекспир), Расул (“Ҳаёт ва Ишқ”-и Ф.Ансорӣ), Мулло Даврон (“Лаҳзаи Ҷовид”-и М.Бахтӣ), Рауф (“Дасти дӯст”-и М.Назаров), Низомиддин Афандӣ (“Дилҳои сӯзон”-и Ҷ.Икромӣ), Шоҳ Алоуддин (“Фарёди Ишқ”- Ғ.Абдулло), Вазир (“Синдбоди Дарёгард”-и Шулжик), Полковник (“Нахи Печида”-и М.Холов)... намунаи қаҳрамонони саҳнавии ҳунарпешаи хушзавқу соҳибистеъдод мебошанд.

6-мақоми Наматиев
Борис Наматиев дар санъати овозхонӣ, хоса, сурудани шашмақом хеле мумтоз буд. Ҳаводорони мусиқии классикӣ то ҳанӯз мақомҳои “Сарахбори ороми ҷон”, “Шаҳнози Гулёр”, “Зулфи парешон”, “Ушшоқ”, “Чапандози Гулёр”, “Чапандози ушшоқ”, “Ироқи Бухоро” дар иҷрои ӯ хуб ёд доранд. Ман бо Наматиев бори аввал тобистони с.1976 дар Бухоро ҳангоми сафари ҳунарии Театри ба номи А.Лоҳутӣ ба ин шаҳри бостонӣ шинос шуда будам. Барои мо-донишҷӯёни Донишкадаи санъат охири сафари ҳунарӣ барномаи консертии мо бо иштироки 2 ҳунарманди маъруф, Б.Наматиев ва Муслима Боқиева комилтару рангинтар гашт. Театри тобистонаи лаби ҳавзи Девонбегӣ аз тамошогарони ҳунардӯсту санъатпарвари Бухоро лабрез буд. Дар консерти охирин роҳбари аввали вилояти Бухоро ва дигар шахсони масъули шаҳру вилоят ширкат доштанд. Бори масъулияти ин консерт, ки консерти ҳукуматӣ унвон дошт, барои мани донишҷӯ ва раҳҷӯи ҳунар ҳамчун ровию барандаи барнома хеле гарон буд. Ҳаяҷони маро Борис-ака дар паси саҳна зуд пай бурда, бо суханони нарму пурмеҳри худ дилбардорӣ карда гуфт, ки: “Ҳамин ҳоло ба ту нигариста ҷавонии худам ва лаҳзаи бори аввал ба саҳна баромадан ёдам омад. Дилатро қавӣ гир, укаҷон! Вақте ки ба саҳна баромадӣ, худи ҳамин ҳаяҷон ва эҳсоси масъулият дар назди тамошобин ба ту кӯмак хоҳад кард. Парво накун, ҳамааш хуб мешавад.” М.Боқиева низ ҳамчун ҳунарманди соҳибтаҷриба суханони ҳикматбори Борис-акаро ҷонибдорӣ карда, барои оғози консерт ба ман нерӯву боварӣ ва илҳом мебахшид.

Ӯ ботинану зоҳиран зебо буд
Наматиев худ марди зебое буд, ки пайваста зебо мепӯшид ва ҳамеша озодаву тамиз буданро дӯст медошт. Дар саҳна ҳам чун дар зиндагӣ тозакориву серталабиро нисбат ба худ мароми фаъолияти хеш қарор дода буд. Дар саҳнаи театри Бухоро тамошогарон намоиши “Сухан ва шамшер” ва ҳунарнамоии ӯро бо эҳсосот ва шавқу завқи баланд пазируфтанд. Устод Ҷ.Икромӣ, ки он шабу рӯзҳо дар зодгоҳашон буданд, ба иваз шудани матни 2 қисмати намоиш вокуниш нишон доданд, вале хоҳарашон бо оби чашм иброз дошт, ки бо ин намоиш ҳасрату аламҳои мо бухороиёнро тоза кардед... Истиқболу пазироии самимии хешу таборони Борис-ака, зиёфату меҳмоннавозии хосаи онҳо аз хотироти ҷолибу неки он сафар буданд...

Ортиқи Қодир
Махсус барои СССР