17.04.2018 1 ҳайати 40 нафараи намояндагони ш. Исфара, бо роҳбарии шаҳрдори он Сиҷоуддин Саломзода ба н.Боткони Ҷумҳурии Қирғизистон сафар намуданд. Бояд қайд намуд, ки гарчанде аз ин пеш сафару вохӯриҳо буданд, аммо дар тайи чанд соли охир ин нахустин сафари ҳайати воломақоми ш.Исфара ба Боткон буда, пазироии меҳмонони Тоҷик аз ҷониби ҳокими ин ноҳия ва аҳли фарҳанги он хеле самимӣ баргузор гашт.     
   Чуноне ки Иқбол Илёсзода, котиби матбуотии раиси ш.Исфара ба мухбири СССР хабар дод, дар раванди мизи мудаввар, ки дар дар фазои ҳусни тафоҳум сурат гирифтааст, иҷрокунандаи вазифаи раиси ш.Исфара Саломзода Сиҷоуддин ва ҳокими ноҳияи Боткон Салихов Кениш Каримович хоссатан зикр намуданд, ки бо ташаббусу кӯшишҳои муштараки роҳбарияти олии мамлакатҳо - Асосгузори сулҳу ваҳдати миллӣ-Пешвои миллат, президенти Ҷумҳурии Тоҷикистон муҳтарам Эмомалӣ Раҳмон ва президенти Ҷумҳурии Қирғизистон Сооронбой Жээнбеков, муносибатҳои бисёрҷонибаи Тоҷикистону Қирғизистон ба сатҳи сифатан нав бароварда шудааст. Ҳамзамон таъкид карда шудааст, ки мардуми тоҷику қирғиз тӯли қарнҳо дар фазои дӯстиву рафоқат ва ҳамсоягӣ зиндагонӣ доштанд ва минбаъд низ ин анъанаи неки гузаштагон идома дода мешавад.
   Ҳар 2 ҷониб бо изҳори ҳавасмандии зиёд омодагии худро ҳамчунин барои дарёфти роҳҳои дастгирии техникии ҳалли мушкилоти дастрасии сокинони минтақаҳои аҳолинишини наздисарҳадӣ бо оби тозаи нӯшокӣ ва полезӣ баён намуда, таъсиси гурӯҳҳои ҳамдастии бонувон ва маҳфили «Ҳамсоягони нек»-ро омили муассире дар самти таҳкими ҳамкориҳо, фазои эътимод ва муносибатҳои неки ҳамсоягӣ арзёбӣ намуданд. Ширкатдорони мизи мудаввар масъалаҳои иҷтимоии маҳалҳои наздисарҳадиро мавриди баррасӣ қарор дода, ба мувофиқае омаданд, ки минбаъд ҳама гуна масъалаҳои ҳалталаб ва мушкилоти бавуҷудомада бояд танҳо бо роҳи гуфтушуниду ҳамдигарфаҳмӣ ҳаллу фасл гарданд ва нофаҳмию муноқишаҳо саривақт пешгирӣ карда шаванд.
   Дар ҷараёни баргузории мизи мудаввар доир ба муҳимияти ҳамкориҳои фарҳангию-гуманитарӣ низ табодули афкори судманд баргузор шуда, роҳандозии робитаҳои бевоситаи доираҳои илмию эҷодӣ, муассисаҳои таълимию фарҳангӣ ва муҳайёсозии шароити ҳамкорӣ дар соҳаи тандурустӣ, варзиш ва сайёҳиро муҳим шумориданд. Бо мақсади тарбияи насли ҷавон дар рӯҳияи дӯстиву рафоқат ва тақвиятбахшии ҳамзистии осоиштаи сокинони минтақаҳои наздисарҳадӣ бунёди майдончаҳои муосири варзишӣ дар деҳоти наздисарҳадии Хоҷаи Аълои ш.Исфара ва Уч – Добои н.Боткон ва дар ин замина ташкилу баргузории мусобиқоти варзишӣ ва барномаҳои фарҳангӣ мувофиқи мақсад дониста шуд.
   Баъд аз анҷоми мизи мудаввар барномаи муштараки фарҳангӣ ва боздид аз мавзейи сайёҳии «Айгул» сурат гирифт.
   Дар назар аст, ки рӯзҳои аввали моҳи май чунин 1 ҳайати воломақоми н.Боткон ба ш.Исфара ташриф биёранд.

18.04.2018. Соат бо вақти Душанбе 15:16 дақиқа.
Маъруфи Ҳисом-шоир ва омӯзгори собиқадор аз ноҳияи Айнӣ дар сӯҳбати телефонӣ бо СССР гуфт, ки обу ҳавои деҳаи Урметани ноҳия хело сард аст ва ҳамин ҳоло борони майда-майда ба барф табдил ёфт. Хабари Ҳисомов дар ҳолест, ки имрӯз аз Маркази обуҳавосанҷӣ ба расонаҳои хабарӣ гуфтаанд, ки ҳавои сарду боронӣ дар Тоҷикистон то 20 апрел идома меёбад…

Вазъи саломатии шоир Бозор Собир дар бемористони Сиэтли Амрико дубора бад шудааст ва рӯзи 17 апрел ӯро аз нав ба шуъбаи реаниматсия интиқол додаанд. Шоир Низом Қосим-раиси ИНТ ба расонаҳои хабарӣ гуфтааст, ки бо супориши президент Эмомалӣ Раҳмон, ҳукумати Тоҷикистон барои табобати Бозор Собир пул ҷудо кардааст ва ин пулро аллакай ба ҳамсари шоир-Гулчеҳра расондаанд. Ба қавли Низом Қосим: "Вазъи саломатии Бозор Собир яксон нест: гоҳ беҳтар мешавад ва гоҳ дубора бадтар. Ман медонам, ки президент аз вазъи саломатии шоир дар ташвиш аст ва бо қарори ӯ ҳукумат барои табобати Бозор Собир маблағи кофӣ ҷудо кардааст. Ман медонам, ки Эмомалӣ Раҳмон супориш дод, то барои табобати шоир беҳтарин табибонро ҷалб кунанд. Анализҳои Бозор Собирро барои ташхис ба Маскав ва ба Олмон фиристодаанд.”
Низом Қосим ҳамчунин гуфтааст, сафирони Тоҷикистон дар Амрико ва СММ-Фарҳод Салим ва Маҳмадамин Маҳмадамин аз 5 апрел ба ин тараф дар паҳлуи Бозор Собир дар шаҳри Сиэттл қарор доранд.

Нақши Георгий Василевич Чичерин дар тақсими миллӣ-маҳаллии Осиёи Миёна калон аст. Болшевикон дар қатори тақсимоти миллӣ, инчунин тақсимоти иқтисодиро низ дар назар гирифта буданд ва тибқи назарияи дуввум дар ОМ мебоист 2 ҷумҳурии аз нигоҳи иқтисодӣ пурзӯр таъсис дода мешуд. Чичерин дар ҳамкорӣ бо ховаршиносони маъруфи рус лоиҳаи мустақими худро ба Бюрои сиёсӣ пешниҳод кард. Тибқи лоиҳаи ӯ, ки бар асли тақсими иқтисодии ОМ барпо гашта буд, дар ҳудуди собиқ аморати Бухоро ва қисмате аз хонигарии Қӯқанд мебоист РСС Тоҷикистон таъсис меёфт. Мутаассифона, дар Маскав ба ин лоиҳа ризоият надоданд ва он танҳо дар коғаз боқӣ монд. Муносибати ӯ бо Сталин низ чандон хуб набуд.

Моҳи сурх
12.04.1961 Юрий Гагарин аввалин инсоне шуд, ки ба фазои кайҳонӣ парвоз кард. Аввалин парвози инсон ба кайҳон 108 дақиқа давом кард ва киштии кайҳонии Восток-1 бо суръати 28 269 км/соат дар зарфи якуним соат, дар баландии 327 км Заминро чархид. Чанде қабл аз парвози таърихии ӯ киштии кайҳонии Восток ЗКА-2 бо манекени монанд ба одам ва 1 сагча ба фазои кайҳонӣ фиристода шуд. Ин манекенро Иван Иванич ва сагчаро Ситорача (Звездочка) номиданд. Соли 1993 ин манекени Иванич дар музоядаи Сотбис бо маблағи 2,88 млн доллар фурӯхта шуд. Парвози Юра ба мухолифати чандсолаи СССР ва ИМА барои тасхири кайҳон хотима гузошт ва СССР дар ин мухолифат пешдастӣ кард. Тобистони с.1955 СССР ва ИМА қариб дар 1 вақт эълон карданд, ки дар соли нав ба кайҳон моҳвора мебароранд. Дар нерӯҳои мусаллаҳи ИМА 3 гурӯҳи мушаксозон бо сарварии Варнер фон Браун заҳмат мекашиданд ва ҳама бар он бовар буданд, ки ИМА дар ин самт яккатози майдон аст.

12.04.1918. Дар РСФСР Декрети Шӯрои Комиссариати Халқӣ ба тасвиб расид, ки тибқи он тамоми ҳайкалҳои хонадони шоҳӣ ва ходимони низоми собиқ барканда, ба ҷояшон ҳайкалҳои ходимони Инқилоби сотсиалистӣ насб гарданд.

12.04.1919. Дар Маскав, дар истгоҳи роҳи оҳани "Москва-Сортировочная" аввалин шанбегии коммунистӣ доир шуд. Дар ин шанбегӣ роҳбарияти ҳизби болшевикӣ, аз ҷумла, раиси ШКХ Владимир Ленин ширкат варзиданд.
12.04.1949. Дар шаҳри Маскав сохтмони бинои асосии ДДМ (МГУ) оғоз гардид. Бинои мазкур дар кӯҳҳои Воробёви Маскав сохта шуда, яке аз зеботарин биноҳои пойтахти СССР ба шумор мерафт.

 Фурудгоҳи байналмилалии Душанбе дар 3-моҳаи аввали соли ҷорӣ ба 310,3 ҳазор нафар мусофир хизмат расонидааст, ки нисбат ба ҳамин давраи соли гузашта 8,6 ҳазор ё 2,9% зиёдтар мебошад. Миқдори умумии бор ва почтаи аз ҷониби анбори тиҷоратии фурудгоҳи Душанбе қабулгардида ва интиқолдодашуда дар семоҳаи аввали соли ҷорӣ  460,0 тн.-ро ташкил дод, ки назар ба ҳамин давраи соли 2017  153,0 тн. ё 25,0 % камтар мебошад. Аз миrдори умумии борҳои содиршуда 11,7 тоннаро маҳсулоти кишоварзӣ ташкил медиҳад.
 Чуноне ки ба мухбири мо дар маркази матбуоти ҶСК «Фурудгоҳи байналмилалии Душанбе» хабар доданд, миқдори рейсҳои хизматрасонидашуда: рейсҳои доимӣ – 1435  адад, ки назар ба ҳамин давраи соли 2017  - 192 рейс ё 15,5 %  зиёдтар мебошад.Теъдоди ҳодисаҳои ба таъхир гузошташавии парвозҳо дар давраи ҳисоботӣ 242 ададро ташкил дод, ки назар ба ҳамин давраи соли гузашта – 59 парвоз ё 16,9%  камтар мебошад.
Сабабҳои асосии ба таъхир гузошта шудани  парвози ҳавопаймоҳо дар фурудгоҳи Душанбе чунинанд: дер омадани ҳавопаймо аз фурудгоҳи макони парвоз – 201 ҳодиса, дахолати ширкатҳои ҳавопаймоӣ (иваз кардани ҳавопаймо ва экипаж, баrайдгирии иловагӣ ва супориши намоянда, тағйирёбии парвозҳо ва ғайра) – 16 ҳодиса, номусоидии обу ҳаво – 12 ҳодиса, ҷорӣ будани реҷа – 4 ҳодиса ва ғайра.
Парвозҳо дар Фурудгоҳи байналмилалии Душанбе аз ҷониби 13 ширкати ҳавопаймоӣ, аз ҷумла: - 5 ширкати ҳавопаймоии мамлакатҳои хориҷии дур («Туркиш Эйрлайн», «Кам Эйр», Хитой, «Флай Дубай», «Осмон Эйр»), 6 ширкати ҳавопаймоии мамлакатҳои Иттиҳоди Давлатҳои Мустақил («Сибир», «Ют Эйр», «Уралские авиалинии» - Россия, «Авиатрафик» - Қирғизистон, «Эйр Астана» – Қазокистон, «Ӯзбекистон ҳаво Йуллари») ва 2 ширкати миллии ҳавопаймоии Тоҷикистон «Тоҷик Эйр» ва «Сомон Эйр» ба амал оварда мешаванд.

 Шоми дирӯз даҳҳо нафар аз дӯстон ва мухлисони паҳлавони шинохта Комроншоҳ Устопириён ба пешвози ӯ ба фурудгоҳи байналмилалии Душанбе омаданд. Комроншоҳ Устопириён пас аз ба даст овардани ғолибият дар Гран-Прии Анталия, ки ҳафтае қабл сурат гирифта буд, бо медали тилло ба Ватан баргашт. Дар баробари мухлисону дӯстон Комроншоҳро падару модар, завҷа ва писарчаи 9-моҳааш Муҳаммадҷон низ пешвоз гирифтанд.
 - Аҳли оилаамро хеле пазмон шудам, алалхусус писарчаамро, ки бо дидану ба оғӯш гирифтанаш тамоми хастагиам баромад. Аз тамоми мардуме, ки ба пешвозам баромаданд, сипосгузорам. Кӯшиш мекунам ин бовариро аз байн набарам, - гуфтааст Комроншоҳ ба журналистон.
Комроншоҳ Устопириён, паҳлавони Тоҷик дар давраи ниҳоии Ҷоми ҷаҳонии дзюдо, ки дар Анталияи Туркия баргузор гашт, бар рақибони худ пирӯз омада, ғолиби ин мусобиқот гашт. Комроншоҳ Устопириён шоми 8.04.2018 дар қувваозмоии ниҳоӣ бо паҳлавони дигари ҷаҳонӣ Неманҷа Маҷдов гӯштин гирифта, пирӯзӣ ба даст овард. Ҷоми ҷаҳонии дзюдо “Анталия Гран При”, ки ҳамасола дар Анталияи Туркия баргузор мешавад, паҳлавонони тамоми оламро ҷамъ менамояд. Паҳлавони дигари Тоҷик Беҳрӯз Хоҷазода дар даври 3-юм мағлуб гардида, аз медал маҳрум гашт. Саидҷалол Саидов, боз 1 паҳлавони дигари мо низ натавонист то марҳилаи ниҳоӣ роҳ ёбад, зеро бо 2 ғолибият ва 2 шикаст аз гирифтани медал бебаҳра монд.