Фурудгоҳи байналмилалии Душанбе дар 3 моҳи аввали соли 2019 ба 334,2 ҳазор нафар мусофир хизмат расонидааст, ки нисбат ба ҳамин давраи соли гузашта 15,4 ҳазор ё 4,83% зиёдтар мебошад. Миқдори умумии бор ва почтаи аз ҷониби терминали боркашонии фурудгоҳи Душанбе қабулгардида ва интиқолдодашуда дар семоҳаи аввали соли ҷорӣ  449,0 тн.-ро ташкил дод. Аз миқдори умумии борҳои содиршуда 3,4 тоннаро маҳсулоти кишоварзӣ ташкил медиҳад.
   Чуноне ки ба мухбири мо дар маркази матбуоти ҶСК “Фурудгоҳи байналмилалии Душанбе” хабар доданд, дар давраи ҳисоботӣ оид ба наомадан, осеб дидан ва гум шудани бағоҷҳо аз xониби мусофирон 218 эрод ворид шудааст, ки назар ба ҳамин давраи соли гузашта-72 эрод 24,83% камтар мебошад, аз онҳо 210 эрод қонеъ гардонида шуда, 8 эрод дар марҳилаи баррасӣ қарор дорад. 
   Теъдоди ҳодисаҳои ба таъхир гузошташавии парвозҳо дар давраи ҳисоботӣ 70 ададро ташкил дод, ки назар ба ҳамин давраи соли гузашта-172 парвоз ё 245,7%  камтар мебошад. Сабабҳои асосии ба таъхир гузошта шудани  парвози ҳавопаймоҳо дар фурудгоҳи Душанбе чунинанд: дер омадани ҳавопаймо аз фурудгоҳи макони парвоз-43 ҳодиса, дахолати ширкатҳои ҳавопаймоӣ (иваз кардани ҳавопаймо ва экипаж, баrайдгирии иловагӣ ва супориши намоянда, тағйирёбии парвозҳо ва ғайра)-15 ҳодиса, гуногун-8 ҳодиса, дахолати хадамотҳои фурудгоҳ (системаи бақайдгирии мусофирон ва ёрии таъҷилӣ ба мусофирон ва ғайра)-3 ҳодиса, дахолати хадамоти гумрук-1 ҳодиса.
    Парвозҳо дар Фурудгоҳи байналмилалии Душанбе аз ҷониби 12 ширкати ҳавопаймоӣ, аз ҷумла, 4 ширкати ҳавопаймоии мамлакатҳои хориҷии дур (“Туркиш эйрлайнс”, “Кам Эйр”, Хатҳои ҷанубии Хитой”, “Флай Дубай”), 7 ширкати ҳавопаймоии мамлакатҳои Иттиҳоди Давлатҳои Мустақил (“Сибир”, “Ют Эйр”, “Уралские авиалинии” - Россия, “Авиатрафик” - Қирғизистон, “Эйр Астана” ва СКАТ – Қазокистон, “Ӯзбекистон ҳаво Йуллари”-Ӯзбекистон) ва 1 ширкати миллии ҳавопаймоии Тоҷикистон - ҶДММ «Сомон Эйр» ба амал оварда мешаванд.
   Аз фурудгоҳи байналмилалии Душанбе ҳавопаймоҳо ба 13 шаҳрҳои Федератсияи Россия, инчунин ба ҷумҳуриҳои Қирғизистон, Қазоқистон, Узбекистон, Олмон, Хитой, Ҷумҳурии Исломии Афғонистон, Ҷумҳурии Туркия, Ҳиндустон ва Аморати Муттаҳидаи Араб парвоз мекунанд. Миқдори умумии рейсҳои доимии ширкатҳои ҳавопаймоии мазкур дар 1 рӯз 13 ададро ташкил медиҳад.

     СССР

   Пагоҳ, 20.04.2019 соати 9:00 дақиқа дар пойтахт мусобиқаи Ниммарафони Х байналмилалии Душанбе мутобиқи хати дави муайангардида оғоз карда мешавад.
   Тавре ба мухбири СССР аз шӯъбаи робитаҳо бо воситаҳои ахбори оммаи МИҲД дар ш.Душанбе хабар доданд, ин Ниммарафон бо мақсади устувор намудани робитаҳои ҳамкорӣ бо бародаршаҳрҳо ва шаҳрҳои бо ш.Душанбе ҳамкории судманди иқтисодиву иҷтимоидошта, баргузор гашта, қарор аст дар он 1 зумра варзишгарон аз шаҳрҳои бародаршаҳри Душанбе иштирок намоянд. Тибқи дастури раиси ш.Душанбе Рустами Эмомалӣ барои мукофотонидани ғолибон Сарраёсати молияи ш.Душанбе 387 803 сомонӣ ҷудо кардааст.
   Инчунин, дар Рӯзи пойтахт, ки ҳамасола шанбеи сеюми моҳи апрел таҷлил карда мешавад, бархе аз озмунҳои шаҳри ҷамъбаст гардида, ғолибон дар маҷлиси тантанавӣ қадрдонӣ хоҳанд гашт.

Вақте шаҳри рӯизаминӣ зеботар мешаваду шаҳри зеризаминӣ баръакс, ифлостар мегардад…

Сайри лола-анъанаи зебои Тоҷикона
6.04.2019. Соат бо вақти Душанбе 10:00 дақиқа.
Дар майдони назди бинои Сирки давлатии кишвар бо садои баланди карнайю доира сайри гули лола оғоз шуд. Даҳҳо намуд лолаҳои рангу баранг, ки бо маҳорати хос дар гулзори шафати бино шинонида шудаанд, ҳусни маконро боз ҳам зеботару ҳавояшро пуртароват мекарданд. Духтарони чаканпӯшу атласпӯш, ки дар ин макон сайругашт доштанд, ба ҳусни лолаҳо ҳусни дигар зам доранд.
Сайри лола барои мардуми Тоҷик анъанаи идонаи наврӯзии нав нест. Аз қадим бо фарорасии фасли баҳор ва Наврӯз, хосса, дар рӯзи 2-юм ё 3-юми он бо аҳли хешу табор, дӯстону пайвандон ба талу теппаҳо ба сайри лолаву лолачинӣ мерафтанд. Тӯшаи сайри лолаашон ҳам он чизе буд, ки ҳар касе аз рӯи шароит бо худ мегирифт. Дар замони шӯравӣ низ ин русум фаромӯш нашуд-ҳатман пас аз Наврӯз, ки таътили баҳории хонандагон оғоз мегардид, муаллимони мактабҳои деҳот кӯдаконро ба «поход», ба лолачинӣ, ба кӯҳу даман мебурданд ва ин лаззати худро дошт.

Ифлос, бадбӯй… - «подземка»-и ҳамшафат
Соат бо вақти Душанбе 10:30 дақиқа.
Воқеан ҳам имрӯз тарофи бинои Сирк диданист, вале ҳамагӣ 2 метр аз ин зебоӣ кас ба ҷое ворид мешавад, ки тамоман баръакси ҳол буда, ба назар ифлостарин гӯшаи дунё, аз кинофилмҳои «ужас»-и Голливудро мемонад… Дар фосилаи ҳамагӣ 2 метр аз ин гулзори пурнакҳат Гузаргоҳи Зеризаминӣ ҷойгир асту ҳамарӯза роҳгузарони зиёд тавассути он роҳро убур мекунанд. Ин гузаргоҳи зеризаминӣ ҳоло дар бадтарин ҳолати санитариву эпидемиологӣ қарор дошта, бӯи бади он дили касро беҳузур мекунад. Паси панҷараҳои оҳанини чандин сол қабл гузошта шуда, пур аз партов ва ифлосӣ буда, дари ба ном мағозаҳо шикаставу пора шудаанд. Деворҳои гузаргоҳ кайҳо нам кашида, ба шикастан сар кардаанду болопӯшҳои оҳанини ҷӯйборҳо низ каҷу шикастаанд. Ҳолати имрӯзи чанд дӯконе, ки дар ин гузаргоҳ ҳанӯз фаъоланд, низ хеле бад буда, вазъи дохилашон низ нигароникунандааст. Аз бӯи бади гузаргоҳ бармеояд, ки бархе аз роҳгузарон дар ин макон қазои ҳоҷат ҳам кардаанду мекунанд…
Вазъи гузаргоҳи дигари ҳамшафати бинои Сирк-рӯбарӯи маркази савдои «Сафар» низ беҳбудӣ мехоҳад. Масъулин гулзори болоро гулкорӣ ва обод кардаанду аз он, ки 2 метр поёнтар чӣ ҳолат аст, хабар надоранд?! Ё фикр мекунанд, меҳмонони мансабдор ва сайёҳоне, ки сайри лола омадаанд, ҳеҷ гоҳ ба «подземка» намефароянд!? Фароед ва аз накҳати гул ва ба бӯйи г… вар хӯред, мӯҳтарам масъулин! Зеро сокинон, меҳмонон, сайёҳони хориҷӣ ҳатман ин накҳатро низ «мечашанд»!

«Подземка»-ҳоро фурӯшгоҳ кунед!
Шумораи гузаргоҳҳои зеризаминӣ дар ш.Душанбе ҳоло ба 10 адад ҳам намерасад. Бархеи гузаргоҳҳо, амсоли назди бозорҳои «Саховат»-у «Варзоб» аз сари нав бунёд ёфта, гузаргоҳҳои маркази шаҳр, хосса, назди фурушгоҳи марказии Тоҷикистон-собиқ СУМ ва маркази савдои «Садбарг» пас аз таъмиру таҷдид хеле тозаву озода шудаанд. Дар аксари ин гузаргоҳҳо дӯконҳои савдо ва фурӯши гулу тӯҳфаҳову ёдгориҳои миллии Тоҷикӣ ба роҳ монда шудааст, ба ҷуз гузаргоҳи зеризаминии назди бозори «Саховат», ки пурра телефонбозор шудааст.
Барои мисол гузаргоҳҳои зеризаминӣ дар ш.Хуҷанд, маркази вилояти Суғд ба Маркази савдо табдил дода шуда, дар зери замин мағозаҳои бароҳати сару либос ва ашёҳои брендӣ фаъоланд. Хеле зебо ва қулай.
Инчунин, маҳз дар ин гузаргоҳҳои зеризаминӣ бояд ҳоҷатхонаҳои муосир барои мардум кушода шаванд-набуди ҳоҷатхона ҳам имрӯз ба проблемаи №1-и пойтахт мубаддал шуда истодааст ва маҳз ин мушкил ҳафтаи гузашта боиси ҷанҷоли 1 сокини пойтахт бо милисаҳо гашта, аввалиро то ба кати беморхона ва ҷарроҳӣ оварда расонид… Пас чаро ин корро аз хуҷандиҳо ёд нагирему тамоми гузаргоҳҳои зеризаминии пойтахтро марказҳои савдо накунем?

Ҷамила Ҳусейнова, СССР
Дар акс ҳолати имрӯзаи саҳни бинои Сирк ва дохили гузаргоҳи зеризаминӣ, ки бозгӯи гуфтаҳои болоанд.

Дар ҳамин маврид:
Хабарнигори дигари СССР, ки он рӯз ба сайри Боғи Ҷомиву Навоӣ рафта буд, ба манзараи баде дучор омад. Модарон кӯдакони худро рӯи сабза ба…қазои ҳоҷат (маъзарат) шинонида буданд (ниг. ба акс). Чу пурсидем, гуфтанд, кӯдак аст, шикамаш дард кард, ҳоҷатхона нест, пас куҷо баремаш? Воқеан ҳам меҳмонону сокинони пойтахт, ки сайри ин ва дигар поркҳо мебароянд, зимни… ба куҷо раванд? Ё мегӯед хурду калон «фархак-памперс» пӯшем?

Ҳолномаи сӯфиёна:
Қурбоналӣ Раҳмонов с.1954 дар деҳаи Навободи ноҳияи Восеъ ба дунё омада, с.1977 Донишкадаи санъати ба номи М.Турсунзодаро хатм кардааст. Дар с.1971, вақте ҳамагӣ 17 сол дошт, дар фестивали ҷумҳуриявӣ соҳиби медали тило ва 1 рубоб гардида, дар саҳнаи тоҷик соҳибном шуд. Дар ҳамин ҷашнвора бо Ҷӯрабек Назриев шинос шуда, ба хайли шогирдони ӯ пайваст ва то ҳанӯз ин риштаи устодиву шогирдӣ ногусаста аст.
Қурбоналӣ Раҳмон баъди хатми донишкада ва адои хидмати ҳарбӣ чанд муддат дар мақомҳои роҳбари Хонаи маданият ва мудири шуъбаи фарҳанги н.Восеъ кор кард. Баъди марги Зариф Наҷмиддинов дар 1 садама раиси колхози овозадори ба номи “Ленин”-и н.Восеъ Миралӣ Маҳмадалиев роҳбарии ансамбли "Чашма”-ро ба Қурбоналӣ Раҳмон супурд. Давраи авҷи шӯҳрати ӯ ба ҳамин ансамбли фолклории "Чашма” рабт мегирад. С.1986 сазовори унвони Ҳунарпешаи шинохтаи РСС Тоҷикистон шуд. Аммо баъди фурӯпошии СССР ва даргузашти Бобои Миралӣ "Чашма” ба вартаи мушкилоти молӣ афтода, аз фаъолият бозмонд. Мавсуф с.1996 ба Душанбе омад ва 2 сол дар ансамбли "Дарё” кор кард. С.1998 роҳбари ансамбли тарона ва рақси "Сомониён” таъйин шуд. С.2004 унвони Ҳунарпешаи халқии Тоҷикистонро ба даст овард. Дар солҳои аввали фаъолияти эҷодиаш асосан таронаҳои халқӣ мехонд, вале солҳои охир бештар дар сабки сӯфиёна эҷод мекунад.

Андар баёни наврӯзии Дубай
Аз сафорати Тоҷикистон дар Арабистон ба мо чунин пайғом омад, ки «акаи Қурбоналӣ, агар бо сафаре банд набошед, мо Шуморо таклиф мекунем: аз 8 то 15 марти ҳамин сол дар шаҳри Риёзи Арабистон сафоратхонаҳо ҳавзаи Наврӯзро ташкил мекунанд». Ростӣ, мо ҳам дар тааҷҷуб мондем, ки дар Арабистон чӣ хел суруд мехонанду кӣ рақс мекунад? Ин дар ҳолест, ки имрӯз ҳам баъзе аз муллоҳо шунидани мусиқиро ҳаром мешуморанд. Хуллас, мо-як гуруҳ ҳунармандон, минҷумла Давлат Назрӣ, рӯзи 5 март озими Дубай шудем ва аз он ҷо ба Риёз роҳ гирифтем. Дар Риёз 4 рӯз истодем. Дар таърихи 8-9 март дар сафоратхонаи Туркия маҳфили Ҳавзаи Наврӯзро барпо карданд. Хушбахтона, дар якҷоягӣ бо 15 сафоратхонаи дунё наврӯзии мо хело дар сатҳи олӣ баргузор гардид. Дар майдони чорабинӣ ҳамчунин намоишгоҳи маҳсули ҳунарҳои зебои тоҷикӣ омода шуда буд, ки таваҷҷуҳи зиёди мардуми ҷамъшударо ба худ ҷалб намуд. Намоиши ҳунарӣ иқдоми хубе буд барои ҷалби ҳаводорони суруду мусиқӣ ва фарҳанги зебои мардуми тоҷик дар ин кишвар. Ин маҳфили зебо ва муаррифии шоистаи Тоҷикистон заминаи мусоиде шуд барои афзун намудани шумораи сайёҳони араб ба кишвари биҳиштосои мо дар солҳои рушди сайёҳӣ ва ҳунарҳои мардумӣ. Хулласи калом, баъди ҳунарнамоӣ дар Наврӯзи Риёзи Арабистон, ки хеле хуб пазироӣ шуд аз ҷониби 15 сафир ва меҳмононашон, имконият даст дод, ки Ҳаҷҷи Ъумраро низ бигузорем ва лаббайкагӯйи даъвати Иброҳим алайҳиссалом буда бошем, ки то қиёмат аз даъвати Заробиддин Қосимӣ-сафири кишварамон дар ун кишвар розиям! Мо 2 рӯз дар Макка истодем, Хонаи Худоро зиёрат кардем, бо фарҳанги аъроб ошноӣ пайдо намудем... Зимнан хидмататон арз кунам, ки дар тамоми олами ислом суруду тарона ҳаст, мехонанд, мерақсанд ва ин, ки муллоҳои чалласавод мегӯянд мусиқӣ ҳаром аст, дурӯғи маҳз ва бофтаи ҳамин тоҷикон асту бас!

Андар баёни Ҷӯрабеку Аҳмад Зоҳир
Вақте ман дар синфи 8 мехондам, ҳунарманде аз ТВ баромад кард, ки Ҷӯрабек Назриев ному насаб дошт ва ин сурудро хонд: «Ма қурбони сару пои ту мешам, Модари ман…». Ана ҳамин суруди ӯро дар 1 озмун, дар шаҳри Кӯлоб хондаму медали тило ҳам гирифтам ва дар шаҳри Душанбе, дар озмуни дигар лаурети фестивали сурудҳои комсомолӣ ҳам шудам. Меҳрубон Назаров-вазири маданият 1 рубоб тақдимам карду 1 медали тило. Бе муҳобот, Назриев ин қадар инқилобе, ки дар ҳунар кардааст, ҳунармандони дигар дар ин сатҳ кам кор кардаанд. Ва ягона инсоне, ки аз ҳисоби Тоҷикон бо Аҳмади Зоҳир рафиқӣ дошт, ин Ҷӯрабек буд, зеро Аҳмад шефтаи овози Ҷӯрабек шуда буд.

Андар баёни унвонҳо
Соли 1986 фестивал байни 2 ноҳия – Восеъ ва Москва (ҳоло Ҳамадонӣ) ҷараён дошту хело рақобатпазир ҳам буд. Москва мактаби Одина Ҳошим дошту Восеъ мактаби бобои Миралӣ Маҳмадалиев. Дар фестивал-озмуни «Бӯстон» бо фарқияти андак имтиёз мо ҷои аввалро гирифтем. Баъди ҳамон фестивал ба ман унвони Артисти хизматнишондодаи РСС Тоҷикистонро доданд.
Бобохон Алиевич Маҳмадов-вазири собиқи фарҳанг, барои ман хизмати бузург кардааст. Боре, шунидам, ки Бобохон Алиевич бемор шудааст. Абдурашид Хӯҷамқулов сабаб шуду гуфт, ки биё назди Маҳмадов равем. Ба вазир занг задем, гуфт, ки «ман ҳоло дар беморхона, пагоҳ ба ҷои кор биёед». Хуб, рафтем ба вазорат ва дар рафти суҳбат Бобохон Алиевич гуфт, ки «биё 1 ансамбл ташкилат кунем». Бо маслиҳати Бобохон Маҳмадов ансамбли «Сомон»-ро таъсис додем ва инак, 22 сол боз дар опера ва балети С.Айнӣ бо ҳамин ансамбл машғулем. Соли 2004 унвони Ҳунарпешаи Халқии Тоҷикистонро гирифтам.

Андар баёни «Табарчаи тилоӣ»
Ба даст овардани «Табарчаи тилоӣ»-и соли 1978 дар Полша ин худ дастоварди бузургест! Бояд гуфт, ки ин яке аз дурахшонтарин сафҳаи фарҳанги РСС Тоҷикистон дар он солҳо буду ҳаст! Сафари мо ба Полша аз ҳисоби Тоҷикистон не, балки аз ҳисоби колхози «Ленин» ва шахсан бобои Миралӣ буд! Ансамбли «Чашма» ягона дастаи ҳунарии пешқадам зери сарпарастии бобои Миралӣ дар колхози «Ленин»-и ноҳияи Восеъ буд, ки ягон мушкили пуливу мо-санъаткорон надоштем. Дар ин фестивали байналхалқӣ беш аз 35 кишвари ҷаҳон иштирок дошт. Дар ин чорабинӣ ва барои соҳиб шудан ба «Табарчаи тиллоӣ» Ҳабибулло Абдураззоқов, Фаттоҳ Одинаев, Анвар Барот, Саодат Умарова, усто Ғулом… нақши бориз гузоштаанд. Ин дастаи ҳунарии мо дар Полша мисли 1 командаи гулчини футбол буд, мунтахаби миллӣ буд ва зимнан ҷои якумро гирифтем!

Андар баёни ҳиммати бобои Миралӣ
Миралӣ Маҳмадалиев-раиси номдори давр сахт мухлиси санъат буданд. Ин аст, ки «Чашма»-ро таъсис додаву чун гавҳараки чашм нигоҳ медоштанд. Мо санъаткорон маоши баланд мегирифтем, автобус доштем, ки хона ба хона, деҳа ба деҳа ҳунармандонро меоварду мебурд. Ягон камбудӣ надоштем. Ёдам ҳаст, боре ба бобои Миралӣ гуфтам, «отпуск» аст, мехоҳем ба Чехословакия дамгирӣ равем. Бобо гуфтанд, чанд сӯм мешавад? Гуфтам фалон қадар. Ба муҳосиб занг задаву гуфт, «пул ҷудо кун, «Хушрӯй» (маро ҳамин хел ном мегирифт) бо 25 артисташ ба истироҳат ба хориҷа равад!». Ҳоло, дигар, ку чунин раисҳо???!!!

Андар баёни Ленину Сталин
Ман шахсан парвардаи фарҳанги миллии даврони СССРам! Аксарияти кулли сиёсатмадорону дипломату давлатмардону фарҳангиёни имрӯзаи мо кадри ҳамон замонаанд. Акаи Ҷӯрабек Ленинро ҳазрат мегӯяду Сталинро алайҳиссалом ва Горбачевро алайҳилаъна! Ва шарҳ медиҳад, ки Ленин ба мисли бархе паёмбарон заҳмат кашиду давлати мардумӣ сохт. Сталин ин давлатро ба авҷи воло расонид. Горбачев барҳамаш зад… Ҳоло мепиндорам, ки Ленину Сталин аз модар бе нафс зода шудаанд. Тамоми ҷангу хунрезиҳо дар дунё аз рӯи нафс аст. Бинед, баъди пошхӯрди СССР дар олам чӣ хунрезиву бесарусомониҳо шуда истодааст. Мо намаки Шӯравиро хӯрдаем, пас чаро ба намакдонаш туф кунем?!

Мусанниф Шаҳрзоди Амин
СССР

PS: Ба пиндори коллективи кори редаксияи мардумӣ кайҳо фурсате расидааст, ки устод Қурбоналӣ Раҳмонов иштирокчӣ ва барандаи давлатии ба номи А.Рӯдакӣ дар соҳаи санъати мусиқӣ гарданд, зеро дар 2 аср, авохири қарни ХХ ва авоили садаи ХХI пайгирона ва мунсифона мунодиву муаррифии фарҳанги этно-халқӣ-профессоналии мусиқаи мо буданду ҳастанд. Мо Метавонем!

(Public art)

Кормандони «IRS» дар баробари дигар корҳо, фаъолияташонро баҳри бартарафсозии пайомадҳои боришот тавсеа бахшиданд...

Зимистони имсола хеле сербарф буд ва бориши пуршиддати борон дар рӯзҳои охир аз он шаҳодат медиҳад, ки ин раванд дар фасли баҳор низ идома хоҳад ёфт.  Мушоҳидаҳо далели онанд, ки сарфи назар аз фарорасии моҳи дуюми фасли баҳор тармафароӣ дар масири роҳи Душанбе-Чанок қатъ нашуда, рӯзҳои охир дар километрҳои 60, 61, 71, 80, 81, 121, 156, 157, 160 тармаҳои калонҳаҷм фаромад.  Ҷоиз ба зикри алоҳида аст, ки  дар муддати кутоҳ техникаҳои пуриқтидори филиали Ширкат ба маҳалли тармафаромада сафарбар ва тармаҳо филфавр бартараф шуданд. Агар дар фасли зимистон кормандони «IRS» ба бартарафсозии тармаҳо, коркарди роҳ бо маводи зиддилағжиш, васеъ кардани роҳ дар минтақаҳои тармафаромада, расонидани кумак ба ронандагони дар роҳ дармонда машғул бошанд, пас дар мавсмими гармо бартарафсозии пайомадаҳои дигар офатҳои табиӣ, аз ҷумла омадани сел, шусташавии роҳ, лағжиши кӯҳпора ва ғайра  мадди назар аст. Илова ба ин,  ҳамасола бо фаро расидани мавсими гармо таъмири ҷорӣ ва куллии роҳ шурӯъ гардида, дар ин замина то 50 километр роҳ таъмири куллӣ ва садҳо километр таъмири ҷорӣ мешавад. Биноан, агар касе андеша дошта бошад, ки бо сипаришавии фасли зимистон сарбории кормандони филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон кам шуда, мавсимҳои  боқимонда бидуни мувоҷеҳ гардидан бо мушкил ва ба сомон расонидани ибтикоре паси сар мешаванд, комилан иштибоҳ мекунанд. Ашхоси огоҳ хуб медонанд, ки  бо фаро расидани фасли баҳор , ки бориши боронро ба дунбол дорад,  дар роҳҳое, ки аз минтақаи кӯҳистони мамлакат мегузаранд  фаромадани сангпораҳо, омадани сел  ва лағжиши куҳпора падидаи маъмул аст. Хоса, шоҳроҳи Душанбе – Чанок, ки қисмати зиёди он  аз чунин минтақаҳо мегузарад, аз  офатҳои табиии зикршуда зиёдтар осебпазир маҳсуб мешавад.
Далелу рақамҳои мавҷуда шаҳодат медиҳанд, ки кормандони филиали Ширкат, ки нигоҳдории шоҳроҳи мазкур ба зиммаашон вогузор аст, баҳри пешгирии чунин ҳолатҳо тавонманданд ва аз имкониятҳои зиёди дар ихтиёрдошта самарнок истифода намуда истодаанд. Вале табиат қонунҳои нонавиштаи худро дорад, ки пешгирии ҳамаи онҳо берун аз имконоти инсон аст... Шоҳиди он ҳастем, ки дар давоми  рӯзи охир дар мамлакат бориши борон раванди муттасил шуда, боиси расидани хисороти ҷиддӣ гардид. Омили мазкур ва дар ин замина омадани сел, лағжиши кӯҳпора ва сангфароӣ дар масири шоҳроҳи Душанбе-Чанок масъулияти кормандони филиали ширкати «IRS»-ро дучанд кард. Лозим ба ёдоварист, ки солҳои қаблӣ низ аз ҷониби филиали Ширкат барои ба ҳолати аввала баргардонидани қитъаҳои селшустаи роҳи мавриди назар маблағи зиёд харҷ гардида, соҳилмустаҳкамкунӣ ва дигар ибтикори ба ин раванд вобаста, мадди назар қарор дошт. Чунин вазъият бештар дар минтақаҳои Варзоб, Зарафшон ва Суғд ба мушоҳида расида, селе, ки дар натиҷаи бориши пуршиддат омад, ба баъзе қитъаҳои роҳ зарари ҷиддӣ расонид. Илова ба ин, ҳамасола дар минтақаи Зарафшон сатҳи оби дарёчаҳои кӯҳӣ ба маротиб баланд шуда, аксар маврид хавфи зери об мондани баъзе мавзеъҳои роҳро ба вуҷуд меорад. Таҷрибаи чанд соли охир далели возеҳи он аст, ки маҳз дар заминаи ҷаҳду талош ва меҳнати шабонарӯзии кормандони  филиали ширкати фавқуззикр шоҳроҳи мазкур, ба истиснои рӯзҳои зиёд будани хавфи тармафароӣ  умуман баста набуд. Мавҷудияти зиёда аз 186 мошину техника ва  механизмҳои  замонавӣ барои нигоҳдории роҳ, ки аксарашон дар ҷумҳурӣ назир надоранд ва бунёди корхонаҳои истеҳсоли мумқир ва дигар масолеҳи барои нигоҳдории роҳ зарур далели возеҳи онанд аст, ки роҳбарияти филиали Ширкат баҳри нигоҳдории роҳ азми қавӣ ва нияти нек доранд.

Маркази матбуоти филиали Ширкати саҳомии «Иновейтив Роуд Солюшнз ЛТД» дар Ҷумҳурии Тоҷикистон