Эй сабо, аз ман ба Исмоили қурбонӣ бигӯ,

Зинда баргаштан зи кӯи Ёр фарзи ишқ нест!!!

Дар фазилати Иди Қурбон онгуна гуфтаанду мегӯянду боз хоҳанд гуфт, ки ин ҷо чизе афзудану кам кардан намебитвон. Вале парадокс ин аст, ки ҳар мусалмон  дар арафаи Иди Қурбон мехоҳад ягон чизи нав бишнавад. Ҳол он ки мардум бояд 1 чиро дарк кунад, ки дин ва оинҳои мазҳабӣ догмаанд. Такроршаванда ва тағйирнаёбанда. То соате, ки мо ин ҳақиқати кӯчакро дарк накунем, аз паси ину он до…и после…муллоҳо рафтан мегирему мегирем ва ба доми терорризму экстремизми евро-евреӣ меафтем. 

Хуб, ун ҳама даъвову дағои муллоҳост. Аммо маро ба навишти ин сутур сухангӯии 1 олими дунявӣ, дар арафаи Иди Қурбони дирӯза, таҳрик дод. Ин олим (унвон бе қавсайн аст, зеро офитсиоз онро дорад охир!) Идгардаки кӯдаконро қариб ҷинояти антибашарӣ мехонд ва далел меовард, ки «идгардаки атфол дар оянда онҳоро ба кӯи гадоиву талбандагӣ мекашад». 

Ба гуфтаи Бобои Ғуломи таърихӣ ҳамин олим дигар кор надорад? Ин олим ё чизеро намедонад ва ё дониста аз сиёсати антимазҳабии мо пуштигирӣ мекунад. Зеро ин шодихӯрдагони салафияву ваҳҳобияанд, ки мутаассуф дар бархе маврид ба ҳукумат, донишпажӯҳишгоҳҳо, суфуфи уламо ва майнаи сари мо чун морони Заҳҳок даромадан доранд. Борҳо гуфтаву боз мегӯям, аксарияти маросиме, ки Танзим манъ кардааст, корест, ки салафияву ваҳҳобия кардан мехост! 3-бегаҳина, 7, 40, сол дуруст аст, ки аз Ислом нестанд. Вале дар оини Ориёи аҳди Қадим ҷорӣ буданд ва Ислом зидди онҳо натанҳо набуд, ки истиқбол кард аз онҳо. Дуову фотиҳа, қурбонӣ, худоӣ, қуръонхонӣ бар ин тарсим фузуд ва олам гулистон гардид.

Парадокс: Касе фаромӯш кардааст, ёдовар мешавем, ки маҳз барои манъи ҳамин оин дар соли 1989-90 низоъ бархест, ки бо ҷанг хатм шуд. 

«Дальше-больше!»-гуфти халқи кабир. Имрӯз ана ҳамин салафия идгардакро манъ карданист. Ба фарқ аз ин олимҳои навбаромад, ман бо факт гап мезанам: 

-шумо дар Душанбеи азиз, Кӯлоби ҷонон, Хуҷанди бостон ва Раштонзамини ростон 1 салафиро ёфта метавонед, ки рӯзи Иди Қурбон сари гӯри падараш рафта дуо кунад? Ва ё фотиҳа хондаву сари дастурхон даст ба рӯй кашад? Ва ё 4 сақич ба атфол идона диҳад? На-ме-ё-бед!!! 

Ва ана ҳамин профессоре, ки бе факту далел Идгардакро макрӯҳ баровард, шодихӯрдаи ана ҳамон ваҳҳобия асту бас! Вале аҷиб онест, ки ӯ тавассути ТВ давлатӣ баромад мекард ва журналист алтернативаи фикри ӯро дар ин навор намекишт!!! Яъне чӣ? Идеологияи антимазҳабии мо дар ТВ дасти тасаллут дорад? Агар не, пас чаро фикру андешаи 1 рӯҳонии пуштигири мазҳаби Имоми Аъзам, ки мо давлати худро пайгири он медонем, дар ин барнома садо надод?

Дар ҷамъ, ин олим 1 далел дошт: гӯиё атфоле, ки ба идгардак мебароянд, хӯю хислати лӯлӣ мегиранд. Ба забони омм «ҷӯгӣ-гарист идгардак». 100 бор ин олим номаъқул кардааст. Зеро ин «недоуч» миллионҳо-миллион Тоҷику ӯзбеки мавзеъи ҷануби кишварро таҳқир кард!!!

Чунки дар марказ ва ҷануби Тоҷикистони азиз, ҳатто тӯли 70 соли шӯравии атеистӣ низ, ин оин роиҷ буд. Яъне атфол ба идгардак мебаромаду дари хонаи мардумро кӯфта мегуфт:

Алӣ шариф муборак,

Тухмо ба кали ёрак.

Иди моро биоред,

Иди шумо муборак!!!

Ва дар ин миён номи чанд нафарро, ин олим, чун мадрак оварда метавонад, ки бузург шудаву гадову талбандаву лӯлӣ шудаанд? Ва ё дар маҳаллае, ки ин олим ба сар мебарад, бинад, чанд гадову талбанда аст ва пурсад, ки оё онҳо дар кӯдакӣ чун атфоли ҷанубу марказ идгардак карда ба ин сатҳ фаромадаанд ва ё фақру бенавоӣ ва маразу касалмандӣ онҳоро ба ин кӯча афганда?

 Айб аст. Шарм аст. Ай-яй-яй аст-гуфти 1 сиёсатшиноси маъруф, вақте олим, донишманд, профессор дар сатҳи зерфарш (плинтус) андешаронӣ мекунаду миллион нафарро бе факту далел ҳақорат медиҳад!

 Ман 200% бовар дорам, тамомии давлатмардони давлатсози мо дар кӯдакӣ идгардак кардаанд! Ман 500% бовар дорам, ягон Тоҷик лӯлӣ нашудааст! Ман 1000% бар боварам, ки низ 1 тоҷик баъди идгардаки рӯзи 20.07.2021 ҷӯгӣ намешавад!!! Ва агар ин олим факт орад, ки зертаъсири маросими идгардак атфоли тоҷик ҷӯгӣ гаштаанд, ин ҷо бикорад ва ман аз ин донишманд расман узр мепурсам. Вале то ин фактро надорад, бояд ҳамон расонае, ки ба ин олим минбар додааст, расман аз Миллати Шарифи Тоҷик узр пурсад!

Ман борҳо гуфтаам ва боз мегӯям бо фанатизм, экстремизм, терроризм бо секуляризм намешавад ҳарб кард. Ва агар ин кор муяссар мешуд, ҳамон давлати СССР-ро пирӯз мекард. Вале минбарро аз олимони фиқҳи ҳанафӣ поккорӣ кардан ба маъное нест, ки онро, яъне минбарро, ба дасти салафиҳои галстукдор диҳем:

Чу минбар ба тахт баробар шавад,

Ҳама ном Бубакру Умар шавад!!!

Ҳушдори ман нест. Аз Фирдавсист. Вале ин ҳамакнун классика аст. Мавзуъи дигар. Ман танҳо инро гуфтаниям, ки ба ҳар тасодуфие минбар надиҳед ва агар медиҳе(м)д назари алтернативиро низ бараш коред. Ҳар нафаре мехоҳад атфолро аз идгардак маҳрум кунад, номаъқулро 100 бор мекунад. Моро намешавад манъ карда! Зеро мо дар мазҳаби бобоёнем ва Мо Метавонем!

- Эҳтимолан 30% сокинони вилояти Хатлон рӯзғорашонро бо мусофиркашонӣ пеш мебаранд. Дар муддати 1 моҳ нархи сӯзишвории гази моеъ 2 маротиба баланд шуда, ваъзи иқтисодӣ, иҷтимоию молиявии мо ва сокинони эҳтиёҷманд боз ҳам бадтар шуд. Хадамоти зиддиинҳисории кишвар магар дар хобби ғафлат аст, ки ин қиматиро намебинад? 

Анвари Мирзоалӣ, сокини н.Ҷ.Балхӣ 

- Ман ба Ҳукумати ҶТ пешниҳод мекунам, ки ба барномаи таҳсилии мактабҳои миёна ва олӣ омӯзиши 3 фанни навро роҳандозӣ намоянд. Инҳо Фарҳанги истифодабарии интернет, Фарҳанги андозсупорӣ ва Фарҳанги муҳоҷири меҳнатӣ

Масалан дар гузашта фанҳои экология, маърифати оиладорӣ, сотсиология, технологияи итилоотӣ пайдо шуда буданд. 

Интернетро бар он асоснок карданиам, ки дар ҷаҳони имрӯз бо шиддат ҷангҳои лафзиву итилоотӣ ва электрониву идеологӣ бо шиддат рафта истодааст ва бояд ба он муқовимат кард. Фанни андозсупориро бар он асоснок карданиам, ки дар замони истиқлолият гуногуншаклии моликият ба вуҷуд омада, пешравии кишварамон аз буҷа вобастагӣ дорад, буҷа бошад фарҳанги баланди андоз супорандагонро тақозо мекунад. Фарҳанги муҳоҷирати меҳнатиро бар он асоснок карданиам, ки аҷдодони мо ориёиҳо дар гузашта дар ҳунари меъморӣ ва наққошиву тасвири шаҳрсозӣ ном бароварда буданд ва ранҷи дасти онҳо хеле гарон ҳисоб карда мешуд. 

Бунёд Ҷоншоев, хонанда ва мухлиси доими газетаи мардумии СССР, сокини н. Дӯстӣ тел: 90 878 78 85

Салом СССР-и азиз! Мо 1 гурӯҳ сокинони биноҳои №9-и к.Н.Қаробоев ва №118-и к.Мушфиқӣ аз дасти шахсоне, ки бидуни иҷозату муҷавиз ва розигии сокинон худсарона ба амалҳои нодуруст даст мезананд, шикоят дорем. 

Дар шафати бинои мо беш аз 20 сол аст, ки дӯкони фурӯши газетаву журнал фаъолият мекунад. Фурӯшандаи ин дӯкон зани тозакор буда, гирду атрофи дӯкон низ ҳамеша тозаву озода аст. Вале чанде пеш бо баҳонаи гузаронидани қубурҳои оби гарм ин мавзеро кофта, пас аз таҷдид дӯкони газетафурӯширо ба таги бино оварда монданд. Инаш дарди ба хайр аст, чун дӯкон ба касе зарар намеорад, вале баъзе ашхос бо истифода аз мансаб ба паҳлӯи дӯкон боз 2 дӯкони дигар-ошхонаи «Тез-тайёр» ва ларёки фурӯши меваю сабзавотро, ки ба Иттиҳодияи «Тоҷикматлубот» дахл дорад, гузоштанду мушкилоти мардум сар шуд.

Ошхонаи «Тез-тайёр» ва ларёки шафати он ба таври шабонарӯзӣ фаъолият намуда, шояд тозагиро боре ҳам надидааст. Тамоми партови ин 2 дӯкон дар ҷӯйбори гирду атрофи бинои мо рехта, вазъияти эпидемикиро боз ҳам бадтар мекунад. Ҷойе, ки ин 2 дӯконро гузоштаанд, бояд сабзкорӣ карда шавад, вале ба ҷойи ободонӣ, баръакс пур аз ифлосист!

М.Ташрипова, С.Мирзоева, О.Мӯсоева, У. Бобоева, М.Давлатов, Х.Идрисов, Г.Умарова ва боз 7 нафари дигар

Зулфия Кенҷаева, сокини деҳаи Чашмасори Ҷамоати деҳоти Ғаллаобод, н.Хуросон (тел: 907 85 79 75) меҳмони идора шуда, тавассути газетаи мардумӣ хост, ки дар арафаи иди Қурбон шахсони сахӣ аз ҳоли ӯ хабар гирифта, барояш кӯмак намоянд.

   - Дар арафаи иди Қурбон аз шахсони саховатпеша ва даст ба хайр хоҳиш менамоям, ки то қадри имкон ба оилаи мо дасти кӯмак расонанд. Шавҳарам 7 моҳ пеш вафот карда, бо 6 фарзанди ноболиғ дар хона мондаам. Рӯзгорамро бо кори мардум-гандумдараву молбонӣ мегузаронам, вале ҳоло мавсими дарав ҳам гузашт. Боре ба назди раиси н.Хуросон Илҳом Аҳмадзода рафтам, барои сохтмони манзил масолеҳи сохтмонӣ дод, 1 аризаи дигарам барои ворид шудан ба рӯйхати камбизоатон дар МИҲД ноҳия аст. Умедворам, ки маро танҳо намегузоранд!