Узви Ихвон-ал-СССР, Рустам Насимов, сокини шаҳри Кӯлоб бо телефони 98 737 11 07 ба СССР занг задаву гуфт, ки очаам 79-сола асту 245 сомонӣ пенсия мегирад. Аммо 2 моҳ боз гоҳе 90, гоҳи дигар 100 сомонии пенсияро аз нафақаи очаам мезананд. Сабабаш номаълум! Ин мушкилро фақат очаи ман на, балки чандин нафақахӯри маҳалла дорад ва ҳич кас иллати онро намедонад, ки дар чист? Аз «Амонатбонк» мегӯянд, ки «шояд 100 сомониро барои саҳми замин гирифта бошанд». Аммо мо аз замин қарздор нестем. Пас барои чӣ 100 сомониро аз нафақа ва бе ягон сабаб мегиранд? Ин мушкилро кӣ бояд ҳал кунад ва кӣ бояд шарҳ диҳад?

Узви Ихвон-ал-СССР, Нураҳмад Тошеви 65-сола, сокини деҳаи Файзободи ноҳияи Ҳамадонӣ бо телефони 918 16 78 91 ба СССР занг задаву гуфт, ки ман 1 одами камбағалу деҳқонам. 1 умр ба ҳайси механизатор барои ободии ин мулку давлат кор кардаам. 1 сол пеш ба нафақа баромадам ва ҳоло 160 сомонӣ нафақа мегирам. Охир, 160 сомонӣ барои ман кам нест? Барои ҳамин ният кардам, ки нафақаро зиёд кунам, аммо мушкили маро прокуратураи ноҳия «резинка» кардан дорад. Чунки бо маслиҳати рафиқонам ба номи прокуратураи ноҳия 6 моҳ пеш ариза дода будам, аммо то ҳозир бо ҳар баҳона корро ҳал намекунанд. Намедонам, ки онҳо чӣ мехоҳанд?

1 бародари бисёр гиромӣ ва басо мардонаи мо, ҷавоне, ки бо даъвати СССР мардонавор бархоставу 5 сол қабл аз паси курсии Донишгоҳи тибб озими Армия шуда буд, ин даъват навиштааст, ки чигуна метавон Тоҷикеро дӯст дошт, ки тарсуву бехирад аст ва Ватанашро дӯст намедорад ва ғ. ва ҳ. Ман ӯро мефаҳмам, хонанда. Зеро то ҷое ҳаққ ҳам ҳаст. Вале сухан сари дӯст доштани индивид нест. Гап сари дӯстдории Миллат меравад! Миллатро метавон бо фардҳои алоҳида, мисли Шераку Спитамен, Катану Рустам, Абӯмуслиму Темурмалик дӯст дошт? Ва ё бо чеҳраҳои алоҳида метавон бад дид? Фарз кардем, ки рустамҳо намедоштем, пас Миллатро дӯст намедоштем? Ва ё билфарзе кардем, аксарият мисли дигар ақвоми гирду наздик бадчеҳраву сияҳдил мешудем, магар Миллатро метавон бад дид?! Фикр мекунам, ки на! Муғулҳо Миллаташонро бо ҳамон Чингизхону бархе ҳатто бо Темури Ланг дӯст медоранд, ки нӯшашон бод!
Миллату Модар, Ватану Падарро интихоб намекунанд. Агар мутаваҷҷеҳ шудаӣ, Худо ҳатто дар мазҳабу динҳо имконияти интихобамон додааст, вале дар интихоби Ватану Миллат на! Аз ҳаммиллат метавон рӯ тофт. Вале аз Миллат на. Бар ҳамдиёр метавон пушт гардонид, вале бар Диёр на! Диёр гуфта Ватанро дар назар дорам! Вале ҳатто ҳамин пушттобиву рӯгардонӣ низ бояд дар чорчӯбаи дохилимиллӣ бошад! Зеро бадар гардид, моли ақвоми ғайр мешавад ва обрӯи Миллатро мерезонад.
Вақте ки бори нахуст озими Шветсия гардида будам, маро ҳушдор-памяткаи овезаи меҳмонхона мутаҳаййир карда буд, ки мегуфт:
-Танқиди Шветсия сирф имтиёзи шведҳост!
Яъне метавон гуфт, ки Шветсия давлати хубе нест, демократия надорад, фарҳангаш паст аст ва ғ. ва ҳ. Вале ба 1 шарт: Агар ту швед бошӣ! Вале ту Тоҷику ӯзбеку русу англисӣ…пас пеши швед ин суханонро нагӯ, ки муште бар даҳону зонуе бар паси сарат хоҳӣ хӯрд!
Ана ҳамин аст, демократияи Ватандорӣ ва Миллӣ. А, дар мо чӣ? Агар дилхоҳ шведу русу ӯзбеку гурҷиву англису амрикоӣ гӯяд, ки Тоҷикон фарҳанги паст доранду аз маданияти шаҳрнишинӣ ориянд, аз даҳонамон кафк резондаву визавиро ҷонибдорӣ мекунем ва ба далелҳояш факт замм менамоем. Наменамоем? Менамоем! Еще как менамоем! Бехабар аз он ки обрӯи миллат, ки рехт, мо барвақт беобрӯ гардидаем…
Чӣ хел фаҳмонам; обрӯи миллатро ақаллан мисли обрӯи ягон хеши дур ҳифз бояд кард. Зеро Тоҷикон воқеан ҳам фарҳанги ҳифзи обрӯ доранд. Ба гунаи мисол, агар ягон хеши дуру наздикамон мурд, мариз шуд, ба ягон проблемае дармонд, ҳатман аз 4 гӯшаи олам хешу табор ҷамъ шуда, бо ин иддао, ки «обрӯ мерезад!», гӯру чӯби баобрӯяш мекунем, доруву дармонаш мехарем, мушкилашро бо ҳар роҳу восита ҳаллу фасл мекунем. Хуб ҳам мекунем! Вале агар мо дар бастагӣ ба Миллати хеш ҳам ҳамин бархӯрдро медоштем, бовар кун, хонанда, кайҳо Тоҷик фахри оламиён мегардид!!!
Муносиботи хешутабории мо-ориёиҳо аз Авасто маншаъ мегирад. Агар нахондаед онро, бок нест, вале агар варақ занед, хубтар аст. Китоб барои хондан аст. Авасто маданияти табордорӣ ва арҷгузорӣ аз русумро барои мо муаррифӣ мекард. Вале мутаассифона, имрӯз китобе нест, ки дастури Миллатдории мо-Тоҷикон буда бошад. Мо ҳатто «Тоҷикон»-и Ғафуровро намехонем.
Воқеан ҳам дар бораи китоб. Агар асарҳои адибони моро хонед, қаҳрамон зодаи маҳалли автор аст. Ин бадбахтии миллист. Вале моро хуш меояд, ки бачаҳои СССР ин таоруфи бадро хатм кардаанд. Аҳмади Иброҳими мо, ки соле қабл китоби навбатии худро муаррифӣ кард, дар бораи қаҳрамонии суғдиписарону бохтариёни аҳди қадим сухан мекунад. «Рӯди пурхун»-китоби нави Аҳмад, ки давоми мантиқии «Спитамен» аст, корзорҳои бобоҳои моро бо Искандари ғосиби мақдунӣ тавре нишон медиҳад, ки аз Тоҷик буданат фахр хоҳӣ кард, хонанда!!!
Мо, ки имрӯз рӯ ба Ғарбем, маданияти миллатпарастиро аз ишон бояд омӯзем. Барои мо дарси беҳтарини миллатпарвардагии аврупоӣ Ҷоми конфедератсияи футбол дар Русия буда метавонист, ки ин ҳафта хатм шуд. Дидед, ки чигуна мардум Суруди Миллӣ хондаву парчами Давлаташонро ҳатто дар сару рӯи худ ҳаккокӣ карда буданд. Ба ун чеҳраҳо ҳатман таваҷҷӯҳ кун, хонанда ва дарк намо, ки ин чеҳраҳо ҳич гоҳ хиёнат ба Миллату Давлати худ нахоҳанд кард ва ҳалолашон бод! Чеҳраҳои ману ту низ бояд бо ранги миллӣ, қалбҳоямон бо фахри миллӣ ва майнаҳоямон бо муҳаббати миллӣ моломолу лабрез бошад ва танҳо дар ин сурат Мо Метавонем! Метавонем, ки ҷурми ҳамдигариро набинем ва Тоҷикро просто так, барои Тоҷик буданаш дӯст дорему парастем!!! Мо Метавонем!!!

Дар задухӯрди шоми 4.07.2017, дар деҳаи Ибрати ҷамоати Тугараки н.Восеъ, дар паҳлуи кӯҳи намаки Хоҷамӯъмин аз наздикони собиқ сардори ОМОНи ВКД ҶТ, полковники фирорӣ Гулмурод Ҳалимов 4 нафар ва ҳамсояи онҳо (ҳамагӣ сокинони деҳаи Дараи Фонии н.Варзоб) кушта шуда, сеи дигар дастгир шудаанд. Ба гуфтаи манобеъ, ин 4 ҷасад ҳоло дар сардхонаи бемористони ш.Кӯлоб қарор доранд. Дар задухӯрд бо наздикони Гулмурод, Анвар Ҳусейнов-муовини сардори раёсати мубориза бо ҷиноятҳои муташаккилонаи вазорати дохила (УБОП) захмӣ шудааст. Гуфта мешавад, яке аз фирориён Анварро бо корд аз дасташ маҷрӯҳ кардааст. Вале Бойназар Тағоев, сардухтури бемористони марказии н.Восеъ ба нашрияи "Пайк" гуфтааст, ҷароҳати Анвар вазнин нест ва бе мушкил сӯҳбат мекунад.
Ин 7 тан аз наздикони Гулмурод бо раҳбарии бародари 53-солааш Султонмурод Ҳалимов, ки қасди фирор ба Афғонистонро доштанд, нирӯҳои УБОП аз Душанбе ба таъқиби онҳо пардохта, ин гурӯҳро нимаи дуюми 4 июл, дар наздикии деҳаи Ибрат қапидаанд. Султонмурод то пайвастани бародараш ба гурӯҳи “Давлати исломӣ”, дар мактаби деҳаи Дараи Фонӣ омӯзгор буд. Сокинони Ибрат гуфтаанд, соатҳои байни 4-у 5-и рӯз ҳудуди 10-15 дақиқа садои тирпарониро шунидаанд. 3 тан аз наздикони боздоштшудаи Ҳалимов дар бозпурсиҳои аввал гуфтаанд, баъди боздошти писари Гулмурод ва аз Русия овардани бародарзодаи дигараш онҳо ба хулосае омадаанд, ки низ дастгир хоҳанд шуд ва ба ин сабаб хостаанд аз Тоҷикистон гурезанд. Яке аз онҳо гуфтааст, азбаски дар фурудгоҳу гузаргоҳҳои марзӣ онҳоро метавонистанд биқапанд, маслиҳат ин шудааст, ки пинҳонӣ аз минтақаи Чубеки н.Ҳамадонӣ ба Давлати Исломии Афғонистон гузаранд. Мақомот ҳоло тафтиш доранд, ки оё наздикони Ҳалимов дар Афғонистон қасди пайвастан ба ягон гурӯҳи тундрав, аз ҷумла, ДОИШ-ро доштанд? Асли волидони Гулмурод Ҳалимов аз н.Восеъ мебошанд ва дар ин ҷо хешу табори зиёд доштанд. Эҳтимол меравад, ки онҳо дар роҳ ба сӯи марз дар хонаҳои хешу табори худ паноҳ бурда бошанд. Ба назар мерасад, аз хонаводаи Гулмурод танҳо 1 нафар Саидмурод Ҳалимов, ки дар Раёсати маҳбасҳои Вазорати адлияи ҶТ кор мекунад.
Наздикони Гулмурод бедарак шудани 4 бародари ӯ-Назир, Комил, Фозил ва Султонмуродро тасдиқ карда, аммо гуфтаанд, ки то ҳол дар бораи кушта шудан ё дар чӣ вазъ будани онҳо хабар надоранд. Абдусалим Ҳалимов-падари Гулмурод ба расонаҳои хабарӣ гуфтааст, ки онҳо субҳи сешанбе гӯё барои кор ба н.Ҳисор рафта, дигар барнагаштанд. "Хеле вақт бекор буданд. Гуфтанд, ки дар н.Ҳисор ҷои кор ёфтаанд ва баъд аз анҷоми кор бармегарданд. Лекин то ҳол занг назадаанд ва даракашон нест". Ба қавли Абдусалом Ҳалимов, 1 гурӯҳ аз нирӯҳои интизомӣ манзилашонро дар Дараи Фонӣ кофтукоб карда, дар бораи тамоси онҳо бо Гулмурод Ҳалимов низ савол додаанд.

Исми кушташудаҳо:
1.Фозил Ҳалимов
2. Султон Ҳалимов
3. Афзал Абдурашидов (бародарзодаи Ҳалимов - фарзанди Хурсанд Ҳалимов)
4. Наим Раҳмонов-ҳамсояи Ҳалимовҳо (додарарӯси Саидмурод Ҳалимов)
Исми дастгиршудаҳо:
1.Алӣ Ҳалимов (писари Султонмурод Ҳалимов)
2.Комил Ҳалимов
3.Назир Ҳалимов.

Наим Раҳмонови 29-сола, ки манобеи расмӣ “роҳбалади” ин гурӯҳи 7-нафарӣ унвон мекунанд, аз нафароне будааст, ки бо наздикони Ҳалимов пас аз пайвастани ӯ ба ДИИШ риштаи дӯстиро наканда будааст. Раъно-модари Наим, 7 июл ба Радиои Озодӣ гуфтааст, ки аз сарнавишти писараш хабар надорад. Ӯ дар гӯристони марказии ш.Душанбе санги мазор метарошид ва ба гуфтаи наздикон он рӯз аз ҷои кораш бо бародару додарзодаҳои Гулмурод ҳамроҳ шудааст. Ба қавли очаи Наим, “саҳари сешанбе аз хона дуо гирифта, ба кор баромада рафт. Аз онҳо дигар хабар нест ва ягон иттилои дақиқ ҳам надорам. Қишлоқро Гулмурод Ҳалимов вайрон кард. Дар қабристони русҳо ҳамроҳи бародараш кор мекард. 4 июл то соати 11 дар қабристон кор карда ва аз бародараш иҷозат мегирад, ки ба хона равад. Вале баъдан ӯро надидем. Бародарони Ҳалимов дар куҷое будаанд, ки ӯро гирифта ҳамроҳи худ бурдаанд. Дирӯз хабар оварданд, ки дар Восеъ 3 бародари Гулмуродро паррондаанд, аммо дар бораи Наим ягон чиз нагуфтанд”. Наим соҳиби 2 фарзанд аст. Муродалии 87-сола, падари Наим аз кушта шудани чанд нафар дар задухӯрд дар Восеъ хабар дорад, вале намедонад, писараш дар миёни кушташудаҳост ва ё боздоштшудаҳо: “Имрӯз 5 рӯз мешавад, ки меноламу намедонам ӯ дар куҷост. Шаби сешанбе милисаи зиёд омада, хонаву оғил ва ошхонаро кофтанд. Пурсидам, ки чӣ мекобед? Боз саҳари чоршанбе омада, дубора хонаҳоро кофтанд, рақами шиносномаҳоро гирифта рафтанд. Бо умед нишастаем. Аз рӯи ҳамин шуда 1 бародарашро, ки дар ГЭСи Варзоб кор мекард ва бояд рӯзҳои наздик вазифаи баландтар мегирифт, аз кор озод карданд”.

7 нафар дар 1 Старекс
1 нафар шоҳиди амалиёти боздошт дар н.Восеъ гуфтааст, ки хешовандони Гулмурод савори 1 микроавтобуси "Старекс” буданд: "Дар назди деҳаи Ибрат онҳо аз "Старекс” фаромаданд ва ҳамин лаҳза 2 мошини дигар пайдо шуд, ки саворонаш дар даст силоҳ, вале дар дар тан либоси мулкӣ доштанд. Мо аввал ҳатто нафаҳмидем, ки онҳо милисаанд. Баъди каме таъқиби мусофирони "Старекс” тирпарронӣ сар шуд. Мисли дар филмҳо.”
Инчунин яке аз афсарони милиса, ки дар амалиёти боздошти хешовандони Гулмурод дар Восеъ ширкат кардааст, гуфтааст, маъмурони УБОПи ш.Душанбе аз қасди ба Афғонистон рафтани хешовандони Ҳалимов огоҳ шуда, аз Душанбе ба таъқиби онҳо пардохтаанд ва танҳо дар назди деҳаи Ибрат пайдо кардаанд: "Чанд бор онҳоро огоҳ кардем, ки ихтиёран таслим шаванд ва ба ҳаво тирҳои огоҳикунанда паррондем. Вале вақте Султонмурод Ҳалимов бо корд ба Анвар Ҳусейнов ҳамла оварда, ӯро захмӣ кард, маҷбур даст ба силоҳ бурдем.”
Хабари фирор ва задухӯрд бо наздикони Ҳалимов дар н.Восеъ дар ҳолест, ки ҳафтаи гузашта 1 бародарзодаи Гулмуродро аз ноҳияи Тахтамуқайи ҷумҳурии Адигеяи Русия ба Душанбе оварданд ва ҳоло дар суд муҳокимаи делои писари 18-солааш Беҳрӯзи Гулмурод, ки моҳи апрел баъди харидани чиптаи парвоз ба Маскав дастгир шуд, идома дорад.
1 манбаъ аз мақомоти интизомӣ ба расонаҳои хабарӣ гуфтааст, Насим Раҳматов- аз хешони дур ва ҳамдеҳаи Гулмурод зоҳиран бо 1 узви гурӯҳи “Давлати исломӣ” дар Афғонистон робита доштааст ва хешовандону ҳамсоягони фармондеҳи фирориро ба кишвари ҳамсоя ҳидоят кардааст. Тамос бо ин фардро Ф.Ҳалимов-бародарзодаи Ҳалимов, ки дар Адигея боздошт ва ба Тоҷикистон истирдод шуд, барқарор кардааст. Гуфта мешуд, ки бар зидди Ф.Ҳалимов дар Тоҷикистон бар асоси моддаи 401-уми Кодекси ҷиноӣ бо иттиҳоми зархаридӣ делои ҷиноятӣ кушодаанд. Манобеи хабарӣ мегӯянд, боздошти Ф.Ҳалимов дар пайи боздошту бозпурсии Беҳрӯз-писари 18-солаи Гулмурод дар моҳи апрел муяссар шудааст: "Пас аз боздошти писари Гулмурод Ҳалимов маълум шуд, ки яке аз тарғибгарони ҷалби ӯ ба сафи гурӯҳи тундрави "Давлати исломӣ” маҳз ҳамин бачаи амакаш будааст, ки бо номҳои гуногун бо ӯ тамос мегирад. Ҳарчанд, бачаи Ҳалимов бо дигар дӯстони падараш низ дар тамос будааст. Ҳоло кирдорҳои ӯро тафтишот баррасӣ мекунад."
Идораи ФСБ-Хадамоти федеролии амнияти Русия дар Адигеяи кишвари Краснодар 12 май хабар дода буд, ки мақомоти ҳифзи ҳуқуқи ин ҷумҳурӣ яке аз хешовандони полковник Гулмурод Ҳалимов-фармондеҳи собиқи ОМОН-воҳиди махсуси ВКД ҶТро, ки 2 сол пеш ба сафи созмони тундрави ДИИШ пайваст, дастгир кардаанд. Гуфта мешуд, ки ба зидди ӯ бар асоси моддаи 205-уми Кодекси ҷиноятии Русия бо иттиҳоми мусоидат ба фаъолиятҳои террористӣ делои ҷиноятӣ кушодаанд. Маркази матбуоти ФСБ-и ҷумҳурии Адигея гуфт, ки хешованди Гулмурод намозгузорони 1 масҷид дар н.Тахтамуқайро ба ҷанг дар сафи ДОИШ даъват мекард. Дар телефонҳои мобилии ин мард маводи таблиғотӣ ва ҳамчунин маълумоте ёфт шудааст, ки аз қасди худи ӯ барои сафар ба Туркия дарак медоданд.

Гулмурод Ҳалимов кист?
Гулмурод Ҳалимов соли 1975 дар Дараи Фонии н.Варзоб ба дунё омада, замони ҷанги шаҳрвандии Тоҷикистон, ки "боевик” шудан мӯд буд, ба Горди президентӣ пайваст ва баъди таҳсилу тамрин дар Амрикову Русия то мақоми фармондеҳи ОМОН расид. Гулмурод, ки дар мактабҳои махсуси Русияву Амрико тамрин гирифтааст, дар моҳи апрели с.2015 ғайб зад ва моҳи майи ҳамон сол бо нашри 1 видео дар Интернет хабар дод, ки дар Ховари Миёна аст ва ба сафи созмони тундрави ИГИЛ пайвастааст. 2 моҳ пеш маҷаллаи маъруфи “Таймс” бо такя ба қавли манобеаш аз кушта шудани Гулмурод хабар дод, вале мақомоти Тоҷикистон гуфтанд, ки ин иттилоъ то ҳол тасдиқ нашудааст. Вале сомонаи хабарии www.akhbor.com бо такя ба сарчашмаҳои хабарии худ дар мақомоти интизомии Тоҷикистон навиштааст, ки ҳаракатҳои ахири хешовандони Гулмурод мақомоти Душанберо ба хулосае овардааст, ки ин фармондеҳи созмони тундрави ДИИШ ғолибан зинда аст ва хешовандонашро раҳнамоӣ мекунад: "Талоши ба Русия ва аз онҷо ба Сурия ё Ироқ рафтани писараш Беҳрӯз, боздошти бародарзодааш дар Адигея ва кушта шудани 4 тан аз наздиконаш ва боздошти сеи дигари онҳо дар роҳи сафар ба Афғонистон нишон медиҳанд, ки Гулмурод худаш ин ҳаракатҳои хешовандонашро раҳбарӣ ва раҳнамоӣ мекард. Маълум аст, ки ДОИШ баъди шикастҳои пайдарпай дар Ироқу Сурия нақша дорад, то ҷабҳаҳои ҷангашро ба манотиқи дигар кӯчонад. Осиёи Марказӣ яке аз чунин самтҳост барои ин гурӯҳи террористӣ ва ба ин мақсад дер боз ҷангҷӯёнашро аз Сурияву Ироқ ба Афғонистон интиқол дода истодааст. Маълумоте ҳаст, ки Гулмуродро низ мехоҳанд ба Афғонистон партоянд, то аз инҷо амалиётҳои ДОИШ-ро ба Осиёи Марказӣ кӯчонад. Хешу таборашро шояд ба ин хотир ба Афғонистон даъват карда буд.”
Гулмурод аз 2 занаш 8 фарзанд дошт. Ҳамсари дуюми ӯ Ҳумайро Мирова-сухангӯи собиқи Хадамоти гумруки Тоҷикистон бо 4 фарзандаш дар с.2015 чанд моҳ баъд аз фирори Ҳалимов низ тарки Тоҷикистон кард, ки бо ӯ дар Сурия ё Ироқ бипайвандад. Аммо модари Беҳрӯз Назокат Муродова бо 4 фарзандаш дар Дараи Фонӣ монд ва ба гуфтаи наздиконаш, аз ҳисоби фурӯхтани молҳое, ки писари калониаш Беҳрӯз аз бозори "Корвон” харида меовард, рӯз мегузаронд.

СССР

Тавре расонаҳои хабарии интернетӣ менависанд, Ҳусейн Чолови 29-сола, писари сеюми Қурбони Чол-фармондеҳи маъруфи замони ҷанги шаҳрвандӣ, 8.07.2017 дар 1 садамаи нақлиётӣ дар ш.Душанбе фавтид. Ҷанозаи ӯро худи ҳамон рӯз дар зодгоҳаш, дар 1 қабристони ш.Кӯлоб, паҳлӯи қабри падараш ба хок супурдаанд. Тибқи манобеъи хабарӣ, Ҳусейн дар ш.Душанбе мезист ва бо мошини «Лексус”-аш дучори садамаи нақлиётӣ шуд. Тафсилоти ин хабар ҳанӯз дастрас нест. Хабари ҳалокати ӯро ибтидо сомонаи www.hamsinf.com нашр кард, вале гуфт, сабаби марги писари фармондеҳи собиқ ҳанӯз рӯшан нест. Ҳусейн, инак 2-умин писари Қурбон Чолов аст, ки айни ҷавонӣ мефавтад. Хотиррасон мекунем, ки акаи ӯ Панҷшер Чолови 31-сола 7.12.2014, ҳамагӣ 1 моҳ баъди вафоти падараш дар Душанбе ба таври ногаҳонӣ аз олам чашм пӯшида буд. Худи Қурбони Чол 5.11.2014 дар синни 54 бар асари фишори хун ва сактаи қалб даргузашт. Ҷанозаи ӯро дар зодгоҳаш шаҳри Кӯлоб дар оромгоҳи маҳаллаи «Қишлоқи тиллоӣ” ба хок супурда буданд.

Панҷшери Чол кӣ буд?
Панҷшер замони ахир (то замони марг), ба тиҷорат машғул буд ва маркази тиҷоратии “Панҷшер”-и назди бозори «Саховат»-и ш.Душанбе ба ӯ тааллуқ дошт. Бозори «Панҷшер», ки дар маҳдудаи рӯизаминии собиқ бозори Саховат сохта шуда буд, аз муосиртарин бозорҳои Тоҷикистони баъдиистиқлол буду ҳаст. Ин маркази тиҷоратӣ, ё худ бозор, хеле васеъ буда, дорои дӯкону фурӯшгоҳ, супермаркетҳои замонавӣ, ошхонаҳои ҷадид аст. Роҷеъ ба ин бозор хеле сару садоҳо зиёд буданд, ки фарзандони элитаи сиёсӣ бо ҳар роҳу восита мехостанд онро харанд, ё аз худ созанд, аммо бародарон Чоловҳо ба ин монеа мегузоштанд. Акнун дигар сарнавишти ин бозор номаълум мемонад… Ва низ овозаҳое имрӯз байни мардум мечархад, ки гӯиё солҳои наздик бозорро бар тибқи Генплан чаппа мекунанд ва ҷояш парк месозанд.

Панҷшер аз чӣ мурд?
Наздикони Панҷшер дар сӯҳбат ба расонаҳо гуфта буданд, ки ӯ пас аз марги падараш гирифтори бемории мармуз шуда, дар назди табибон табобат мегирифт. Вале мегуфтанд онҳо, бемориаш чандон вазнин ва нигаронкунанда набуд ва маргаш боиси ҳайронии аҳлу пайвандон шуда. Ин дар ҳолест, ки Панҷшер пас аз марги падари маъруфу номиаш-Қурбони Чол, ки писари нахустин ва эркаи қумандон будӣ, комилан аз зиндагӣ дилсард шуда буд. Мегӯянд, баъди сари падар, ӯ бештари вақти худро дар танҳоӣ мегузаронд ва хеле зиқ буд.
Исми Панҷшер дар тӯли умри кӯтоҳи худ ҳамагӣ 1 бор, санаи 26.11.2013 расонаӣ шуд. Ин ҳам вақте ки тасодуфан 1 пиёдагардро зада буд. Захми он пиёдагард чандон сахт набуду зуд сиҳҳат ёфт. Вале Панҷшери Чол тамомии пардохти ӯро ба гардан гирифт ва дар назди хабарнигорони ТВТ мардона иқрор карда буд, ки он соати наҳс каме сархуш буду ногаҳон ин пиёдагардро зер кардааст. Бо ин ҳама ӯ ҷарима баста шуд ва озод гардид.
Панҷшер, мисли падараш Қурбони Чол, дар ш.Душанбе вафот кард ва ҷасадашро ба шаҳри Кӯлоб бурдаву паҳлӯи падараш-Қурбони Чоле, ки ҳанӯз худоии чилашро нагирифтаанд, ба хок супориданд.

Фавти Қурбони Чол
Ҳарчанд Қурбони Чол-маъруфтарин ва машҳуртарин чеҳраи ҷанги граждании Тоҷикистон дар солҳои 1992-97 замони ахир бемории вазнин дошт, аммо маргаш мисли тундар дар ҳавои соф садо дода буд. Қурбони Чол, ки аз авторитетҳои шаҳри криминалитарини собиқ РСС Тоҷикистон дар солҳои шӯравӣ буд, 33 рӯз пештарак аз писараш-Панҷшер, дар таърихи 5.11.2014 дар синни 54 аз дунё гузашт. Баъдан гуфта шуд, ки Қурбон борҳо ҷарроҳӣ шудаву ҳатто дар хориҷа дили сунъӣ гузошта будааст…ки ин иддао бештар ба овоза шабеҳ буд, ки ба ҳақиқат наздик бошад.

Қурбони Чол кӣ буд?
Қурбони Чол яке аз асосгузорон ва чеҳраи номдортарини Фронти халқии Кӯлоб буд, ки дар сари кор овардани ҳукумати конститутсионӣ нақши бориз дошт. Тавре Қувваталӣ Муродов-раҳбари бахши тиббии Фронти Халқӣ дар суҳбат бо расонаҳои хориҷӣ гуфтааст, ки бо Чоловҳо бори аввал зимистони соли 1993 дар Қӯрғонтеппа дучор омад ва он замон аслан ҳарфи аввалро дар ин оила падарашон мезад: “Худи Қурбон 1 ҷавони боғайрату ҷасур ва бомаънӣ буд. Гуруҳи ӯ аз Ургутмаҳаллаи Қӯрғонтеппа гирифта, то Колхозободу Ҷиликӯл ҷангида буд. Ӯ ба Панҷ нарафт. Масъулияти Панҷ ба зиммаи бародараш Султон буд.”
Хонандаи закӣ ва узви Ихвон ал СССР медонад, ки дар солҳои ин ҷанг ва пас аз он низ разборкаҳои криминалӣ ва баҳсу кашмакашҳои милливу маҳаллӣ ва территориявӣ зиёд мешуданд. Ва ҳар гоҳе, ки ин баҳсҳо то задухурд мекашиданд, қумандонҳо ва ҳукуматдорон аз Қурбони Чол хоҳиш мекарданд, ки ба баҳс нуқтаи таммат гузорад. Омадани Қурбону бародаронаш кофӣ буд, ки дилхоҳ баҳс ҳаллу фасл шавад. Боризтарин разборкаи Чол бо Маҳмуд Худойбердиев дар шаҳри Қурғонтеппа рух дода буд, ки полковники саркаш-Маҳмуд, дар соли 1994-95 мехост, Қурғонтеппаро ҷудо кардаву ба Ӯзбакистон қӯш созад (ин гирудор баъди сари Сангак Сафарови номӣ матраҳ мешуд. Дар зиндагонии Сангак Маҳмуд куҷо дилу гурдае дошт, ки зидди дед барояд?).
Он замон, кор қариб ба ҷанги дохилии Фронти халқӣ мекашид, вале бар тибқи шаҳодати шоҳидон, бародарон Чоловҳо ба Қурғонтеппа омада, ба масале «алови чашми Маҳмудро гирифтанд» ва ӯ чанд сол хомӯш шудаву танҳо соли 1997-98, ки Чолҳо аз мақомот дур шуданд, аз худ дарак дода буд, ки тамоман қиссаи дигар аст… Ва аммо бархе аз разборҳои Чоловҳо бо аҳолии худи шаҳри Кӯлоб, ба вежа дахолати онҳо ба маъракаи интихоботии Султон Қуввати номӣ, нуфузи онҳоро дар миёни аҳолии сарбаланди Кӯлоб коста сохта буд.

Султони Чол-рамзи  ҷанги гражданӣ
Дар бораи биографияи Султони Чол бошад, Раҷабмурод Акрамзода-собиқ омӯзгори мактаби №29-и деҳаи Чойхонаи н.Ёвон, дар яке аз шумораҳои газетаи мардумии СССР бо чанд мисраъ шеър навишта буд:
Султон шаҳидай, чашмони Султон шоҳидай,
Қомати базеб миҷгони Султон шоҳидай.
Ӯ ҷони ширин фидо намуд баҳри Ватан,
Орзуву амоли ҷони Султон шоҳидай.
Султони Чол 20.10.1962 дар кӯч.Гагарини (ҳоло Абдулло Мӯсо) ш.Кӯлоб таваллуд ёфтааст. Ӯ хатмкардаи мактаби №1 ш.Кӯлоб аст. Султони Чол дар мактаб бо баҳои хубу аъло мехонд ва ба дарсҳои таърих, адабиёт ва тайёрии ҳарбию тарбияи ҷисмонӣ шавқи бештар дошт. Ӯ ҷавони ватандӯст буд. Қаҳрамониҳои Рустаму Сӯҳроб, Сиёвуш, Шерак, Темурмалику Восеъ ӯро дар рӯҳияи ватанпарварию нигоҳубини марзу хоки Ватан будан ба воя расонид. Баъди хатми мактаб соли 1985 ба Донишкадаи тарбияи ҷисмонӣ дохил шуда, соли 1990 онро хатм намуд. Чемпиони Кӯлоб, вилоят ва РСС Тоҷикистон оид ба бокс буд.

Султон амини «қаротегиниҳо»-и Панҷ
Султон дар таъмини амнияти ҷони даҳҳо ҳазор тоҷикони водии Қаротегину Дарвоз дар н.Панҷ саҳм гузоштааст. Дилхоҳ сокинони маҳаллӣ медонанд, ки агар Султон намебуд, онҳо зинда намемонданд! Ӯ ҳамзамон барои баргардонидани гурезаҳо аз хоки Афғонистон саҳмгузор буд. Аз соли 1994 то 1998 полковники Вазорати корҳои дохилии Ҷумҳурии Тоҷикистон шуда кор кардааст. Султон ҳамагӣ 36 сол дошту соҳиби 4 фарзанд буд: Шамшер, Сарвиноз, Алишер ва Холисамоҳ. Ҳамсараш Гулшода низ ӯро бо тамоми ҳастиаш дӯст медошт ва дар симои ӯ бахти хонаводаашро медид… Мутаассифона, дар айни камолот марги нобаҳангом Султони ватандӯстро 2.08.1998 аз аҳли оилаву пайвандону ҷигарбандонаш ҷудо кард ва то ҳол сабаби марги ӯ фош нашудааст… Бархе марги ӯро бо заҳрпошӣ агар олуда медонистанд, зумрае мегуфтанд, ки муътод гардида буд ва бархе аз наздикон дар фавташ ҷодугарони маҳаллиро гунаҳкор дониста, теъдоде аз муллоҳои ҷодугари маҳаллиро сахт азият доданд. Воқеан ҳам, имрӯз, ба пиндори мо замоне расидааст, ки ин ҷодугаронро мисли Чоловҳо бояд дубора сахтакак ҷазо дод, то ба зиндагонии мардум камтар дахолат созанд. Яъне Чолҳо беҳтарин кор карданд, ки ҷодугаронро дафъ намуданд!!!

Раҳмони Чол-стротеги №1
Полковник Раҳмони Чол аз стротегҳои бародарон ва раиси ситодашон буд. Ӯ хеле нафари корозмуда ва соҳибдониш ҳам маҳсуб мерафт, ки чанд илми олӣ дорад. Раҳмони Чол вежагии дигаре ҳам дошт, ки хеле нафари миллӣ ва соҳибдониш буд. Ӯ аз нахустин қумандонҳои саҳроӣ шуд, ки макри ҷанги Тоҷиккушро дарёфт ва Тоҷиконро новобаста аз маҳаллу макони зист, бо 1 чашм дид ва ҷони садҳо ҳазор нафарро харид. Бо талошҳои ӯ фармондеҳони аршад ҷони ҳазорон Тоҷикони ба масал «қаротегинӣ»-ро ки тамағаи «вовчик» ҳамаашонро ҳадафи тир қарор медод, наҷот доданд! Имрӯз бояд ошкоро гуфт, ки агар Чоловҳо ва қумандон Шамолов намебуданд, турку арабҳои вилояти Қурғонтеппа шояд тоҷикеро зинда намегузоштанд. Мо медонем чӣ мегӯем. Мо Метавонем!

Сулаймон кӣ буд?
Бояд гуфт, ки санаи 5.03.2017 ҷасади Сулаймон Раҳмонзоди 21-соларо сокинони н.Восеъ ёфтанд. Ӯ писари Раҳмони Чол буд. Яке аз наздиконаш гуфта буд, ки Сулаймон гирифтори бемории рӯҳӣ буд ва 1 ҳафта пеш аз хона ғайб зад. Дар бораи марги ӯ Араби Дустмурод-сокини деҳаи Нонҷемас дар СССР гузориш дода буд. Худи Раҳмон бошад с.2016 бо гуноҳи қочоқи маводи мухаддир зиндонӣ шуд ва 2 рӯз пештар аз марги писараш-Сулаймон дар зиндон даргузашт.
Бародарон Чоловҳо чанд нафаранд?
Дар шаҳри Кӯлоб Чоловҳо баъди ҷанг хеле маъруф шуданд. Ҳарчанд то ҷанг ҳаёти оддӣ ва фақиронае дошта будаанд. Падари хонавода, Аҳмад Чолов буд,  ки 9 писар дошт: Қурбон, Султон, Раҳмон, Давлат, Сулаймон, Кишвар, Фирдавс, Файз ва Ҷавҳар. Ин оилаи бузург аз маъруфтарин хонаводаи қумондонҳои ҷанги шаҳрвандианд, ки чанд соли ахир комилан нуфузи худро аз даст дода, аз саҳнаи сиёсӣ дур шудаанд. Аҳмади Чол (падарашон), Султон ва Қурбон Чолов бандагиро хатм карданд. Панҷшер, Раҳмон, Ҳусейн ва Сулаймон низ бо онҳо пайваст, ки ҷумлагиро Худо биомурзад ва раҳмат кунад. Фирдавси Чол, ки зиндонӣ буд, баъди фавти бародараш Қурбон, тибқи Қонуни афв озод шуд. Давлати Чол-бародари дигар ва ҳамакнун аз ҳама маъруфи Чоловҳо ин лаҳзаҳо зиндонист ва парвандааш дар бастагӣ ба ҷалби ҷавонони кӯлобӣ ба ҷиҳоди Сурия баррасӣ мешавад. Дигар бародарони Чоловҳо ҳамакнун бо тиҷорат машғуланд.

...Оила намунавӣ набуд!
Вале бо ин ҳама наметавон гуфт, ки ин оилаи намунавӣ буд. Дар ин миён бархе аз намояндагони ин сулола ба таъбири маъруфи он давру замона ба беспределӣ даст мезаданд, ки муҳаббати сокинони Кӯлобро дар нисбат ба онҳо коҳиш медод. Афроди шӯрапуште, ки атрофи ин хонавода ҷамъ шуда буданд, низ ба бетартибиву бенизомӣ даст мезаданд, ки дар ҷамъ ангушти таъкид сари Чоловҳо мерафт. Вале бо ин ҳама аксарият шоҳиданд, ки худи Қурбони Чол-сарвари ин фамилия, ягон бор, ягон нафарро сақат нагуфтааст, таҳдиду таҳқир насохтааст. Ба пиндори 1 нафари хеле зирак, «Қурбони Чол охирин намояндаи сулолаи мафияи Ситсилия дар Амрико-Дон Карлеониро ба хотир меовард, ки мутаассуф ё хушбахтона даврони онҳо пушти сар шуда рафт»…

Шаҳрзоди Амин,
СССР

15.07.1975 дар айни ҷанги сард 2 киштии кайҳонӣ-"Союз"-и шӯравӣ ва "Аполлон"-и амрикоӣ, яке аз Байканури Қазоқистон ва дуввумӣ аз димоғаи Каннавери ИМА ба самти ҳамдигар париданд. Соати 15:20 дақиқа "Союз-19" бо кайҳоннавардон Леонов ва Кубасов ба фазо бархост ва 7 соату 30 дақиқа пас "Аполлон" бо кайҳоннавардон Стаффорд, Бранд ва Слейтон ба парвоз даромад. Ин лоиҳаи муштараки шӯравӣ-амрикоӣ дар таърих чун аввалин гармшавии иқлими сиёсӣ дар сайёраи Замин сабт шудааст.

13.07.1925. Папаи Рим - Пийи XII эълон кард, ки ҳар масеҳии котолик ихтиёрӣ ва дидаву дониста, шомили ҳизби коммунист мешавад ё онро ба ҳар васоиле дастгирӣ мекунад, аз дини масеҳият хориҷ мегардад.

Туркманистон тасмим гирифтааст, ки 1 кумитаи махсуси мубориза бо фасод ташкил кунад. Ин Кумита аз сохторҳои низомӣ ва ҳифзи ҳуқуқ вобаста нахоҳад буд. Бино бар иттилои мақомоти он кишвар, ниҳоди нави мубориза бо фасод дорои салоҳиятҳои васеъ хоҳад шуд, ки эҳтимол дорад, баъди таъсиси он шумори боздоштҳо дар робита ба порахӯрӣ афзоиш ёбад. Ёдрас мешавем, 12 май президенти Туркманистон Қурбонгулӣ Бердимуҳаммадов ба котиби Шӯрои амнияти давлат ва раиси порлумон дастур дод, ки барномаи махсуси мубориза бо фасод ва порахӯрӣ таҳия кунанд.