Мақомоти қудратии в.Хатлон субҳи имрӯз, 19 ноябр дар роҳҳои автомобили Бохтару Вахш ва Леваканду Кӯшониён постгоҳҳои иловагиро таъсис додаст. 1 манбаъ дар сӯҳбати телефонӣ бо мухбири СССР гуфт, ки дар сарҳадҳои шаҳру ноҳияҳои в.Хатлон бо мақсади гузаронидани рейдҳои муштарак постгоҳҳо пурзӯр карда шудаанд.
   Аммо вобаста ба ин дар байни мардум овозаҳо ҳаст, ки гӯйё дар ҳудуди н.Вахш 1 автомашинаи тамғаи "Мерседес бенс" 3 нафарро пахш карда, аз ҷои ҳодиса фирор кардааст ё афроде, ки маблағи бузургеро дар н.Вахш рабудаанд, дар гурезанд.
   Шарбатулло Азизулло, раиси н.Вахш дар сӯҳбати телефонӣ ин овозаҳоро бе асос шуморида гуфт, ки дар ҳудуди ноҳия ягон ҷиноят содир нашудааст.     Турахонов Сироҷиддин, сардори БДА-и вилояти Хатлон низ ин хабарро тасдиқ накард ва гуфт, ки сабаби гузоштани постгоҳҳои иловагӣ ин анҷом додани нақша-чорабинии оперативии мақомоти қудратӣ асту халос.

Баҳодур Уроқов, СССР, вилояти Хатлон

  Дар 10 моҳи соли равон дар в.Хатлон 6000 хатнасур бо таври ройгон анҷом дода шудааст. Сокинони вилоят қаблан фарзадонашонро дар хона бо иштироки устои маҳаллӣ хатна мекарданд, вале ҳоло бошад ин амалро бештар дар беморхонаҳо анҷом медиҳанд.
   Нозим Азизов сокини н. Кушониён дар сӯҳбати СССР афзуд, ки аз ин кор хело шод аст, зеро хатнаи кӯдакон дар муассисаҳои тиббӣ ройгон анҷом дода шуда, зимни гузаронидани ин кор тамоми талаботҳои лозима ба назар гирифта мешаванд.
   - Ҷойи пӯшида нест, ки аксарияти мардум камбизоатанд ва на ҳама имконияти маъракаи тӯйю сури хатнасурро доранд. Ҳозир ман 2 писарамро ба ин муассисаи тиббӣ ш.Бохтар овардаам, писари калониам ба синфи 1 меравад, дигараш 5 сола аст, пештар имкони туй надоштам, ҳоло бошад аз ҷониби табибон бо тариқи ройгон писаронамро хатна карда ба хона мебарам, - гуфт Нозим Азизов.
   Мувофиқи тағйиру иловаҳои воридгардида дар рӯзҳои иди Рамазон ва Қурбон оростани дастурхони маънавӣ ва хоксорона, роҳ надодан ба исрофкорӣ ва зиёдаравӣ, дар доираи оила бе хизматрасонии санъаткорон гузаронидани хатнасур, бо розигии падару модар аз рӯзи таваллуди писар то 20 рӯзагӣ дар муассисаҳои тиббӣ ба таври ройгон анҷом додани хатна пешбинӣ гардидааст.

Баҳодур Уроқов, СССР, вилояти Хатлон

   17.11.2018, яъне пагоҳ дар Муассисаи давлатии  «Наврӯзгоҳ»-и ш.Душанбе  намоиши театришуда  бахшида ба истифода додани  агрегати якуми  Неругоҳи  барқии обии «Роғун»  баргузор мегардад. Ҳамчунин дар ин рӯз  баъди анҷоми намоиш ба муддати 5 дақиқа мушакпарронии (фейерверки) идона сурат мегирад.
    Бино ба иттилои аз Ҳукумати ш.Душанбе расида, ҳамчунин 17 ноябр  дар тамоми боғҳо ва  дигар маконҳои фарҳангию фароғатӣ барои сокинону меҳмонони пойтахт сайру гашти  оммавӣ ва  барномаҳои фарҳангӣ баргузор мегарданд. Аз ҷумла, чунин барномаҳои идона дар Боғи фарҳангию фароғатии ба номи Садриддин Айнии н.Исмоили Сомонӣ, Боғи фарҳангию фароғатии ба номи Абдулқосим Фирдавсии н.Фирдавсӣ,   майдони 800-солагии Москваи  н.Шоҳмансур ва майдони назди Прокуратураи генералӣ  дар н.Сино  баргузор мегарданд.
    ИНчунин, бо ташаббуси мақомоти иҷроияи ҳокимияти давлатии ш.Душанбе   имрӯз ва пагоҳ, 16-17 ноябри соли равон дар  пойтахт ярмаркаҳои фурӯши маҳсулоти кишоварзӣ низ баргузор карда мешаванд. Аз ҷониби Агентии захираҳои моддии давлатӣ ва Иттифоқи «Тоҷикматлубот» ярмаркаҳои фурӯши маҳсулоти кишоварзӣ  дар ҳамаи бозорҳои шаҳр  ташкил карда мешаванд. Ҳамчунин  чунин ярмаркаҳо аз ҷониби кишоварзони вилояти Хатлон ва н.Рӯдакӣ дар КВД «Бозори Саховат», деҳқонони  вилояти Суғд, шаҳрҳои Турсунзодаву Ҳисор ва ноҳияи Шаҳринав дар КВД «Бозори Меҳргон», ш.Ваҳдат ва ноҳияҳои Файзободу Лахш дар Бозори «Қарияи боло» ва ноҳияҳои Тоҷикобод, Рашт, Сангвор ва Нуробод дар бозори «Ховарон» ташкил гардида, дар онҳо маҳсулоти кишоварзӣ пешниҳоди сокинону меҳмонони пойтахт гардонида мешаванд.
 

  Ҷиҳати пешгирӣ намудани содиршавии садамаҳои роҳу нақлиётӣ ва дигар ҳуқуқвайронкуниҳои маъмурӣ аз ҷониби ронандагони воситаҳои нақлиёти мусофиркашон, ба танзим даровардани ҳаракати бонизоми нақлиёти мусофиркашони ҷамъиятӣ аз ҳафтаи равон кормандони Шӯъбаи БДА дар ш.Душанбе ба ширкату корхонаҳои нақлиётии мусофиркашони ҷамъиятӣ вобаста гардиданд.
   Чуноне ки ба мухбири СССР дар маркази матбуоти РВКД ҶТ хабар доданд, дар доираи иҷроиши дастуру супоришҳо ва Қарори Раиси ш.Душанбе Рустами Эмомалӣ таҳти №63 аз 30 январи соли ҷорӣ “Дар бораи таъсис додани гурӯҳи таблиғотӣ оид ба тарғиби одоби шаҳрнишинӣ, густариши корҳои ободонӣ ва баланд бардоштани маърифати ҳуқуқии сокинони шаҳри Душанбе”ҷиҳати баланд бардоштани маърифату маданият ва муоширати ронандагон ҳангоми муомила бо мизоҷон, муайян ва рафъи сабабу шароитҳои ба содиршавии садамаҳои нақлиётӣ, аз ҷумла бо оқибатҳои ҳалокатовар мусоидаткунанда аз ҷониби ронандагони воситаҳои нақлиёти ҷамъиятӣ, аз байн бурдани муносибати дағал ва дигар ҳаракатҳои майдаавбошона дар дохили нақлиёти ҷамъиятӣ ва ба таври ҳатмӣ фаъолият намудани ронандагони нақлиёти ҷамъиятӣ ва ёрдамчиёни онҳо (кондукторҳо) бо либосҳои ягона ҳайати калони роҳбарикунандаи Шӯъбаи БДА ва ҷузъу томҳои он дар ноҳияҳои пойтахт ба ҳама 24 адад ширкатҳои мусофиркашони ҷамъиятии дар ҳудуди ш.Душанбе ҷойгирбуда вобаста карда шудаанд.
    Зеро аз омори расмии ба қайдгирифташуда бармеояд, давоми 9 моҳи соли ҷорӣ дар ҳудуди шаҳри Душнанбе маҷмуан 148 786 адад қоидавайронкуниҳои ҳаракат дар роҳ ошкор карда шудааст, ки 27 661 адади онҳо ба таври дағалона аз ҷониби ронандагони воситаҳои нақлиёти мусофиркашони ҷамъиятӣ содир карда шудааст.
  Тибқи таҳлилу омӯзишҳо 27 661 – қоидаваронкунӣ аз шумораи умумии ҳуқуқвайронкуниҳои ошкоркардашуда 18,6%-ро ташкил медиҳад. Илова бар ин, давоми 9 моҳи соли ҷорӣ аз ҷониби ронандагони воситаҳои нақлиёти мусофиркашонӣ дар ҳудуди шаҳри Душанбе 18 адад садамаҳои роҳу нақлиётӣ ба қайд гирифта шудааст, ки бар асари онҳо 2-нафар ба ҳалокат расида, 16-нафари дигар ҷароҳатҳои вазнин бардоштаанд.
Аз ин лиҳоз, бо мақсади таъмини боэътимоди волоияти қонун, тартибот ва амнияти ҷамъиятӣ, риояи ҳатмии талаботҳои қонунгузории кишвар ва “Қоидаҳои ҳаракат дар роҳ” зимни ҳаракати воситаҳои нақлиёти мусофиркашон,  саривақт огоҳӣ ёфтан аз камбудиҳои содирнамудаи ронандагони воситаҳои нақлиёти мусофиркашон, муайян ва рафъи сабабу шароитҳои ба содиршавии садамаҳои нақлиётӣ, аз ҷумла бо оқибатҳои ҳалокатовар мусоидаткунанда аз ҷониби ронандагони воситаҳои нақлиёти ҷамъиятӣ, баланд бардоштани маърифату маданияти ронандагон ҳангоми муомила бо мизоҷон, аз байн бурдани муносибати дағал ва дигар ҳаракатҳои майдаавбошона дар дохили нақлиёти ҷамъиятӣ;
– ба таври ҳатмӣ фаъолият намудани ронандагони нақлиёти ҷамъиятӣ ва ёрдамчиёни онҳо (кондукторҳо) бо либосҳои ягона, роҳ надодан ба камбудиҳои такрорӣ аз ҷониби масъулини корхонаҳои нақлиётӣ Фармоиши махсуси сардори Раёсати ВКД дар ш.Душанбе генерал-майори милитсия Назарзода Шариф Раҳмон таҳти №191 аз 30 октбяри соли 2018 “Дар бораи вобаста намудани ҳайати калони роҳбарикунандаи Шуъбаи БДА ба ширкатҳои мусофиркашони ҷамъиятии шаҳри Душанбе” ба имзо расид.
  Дар асоси талаботи банди 2-и Фармоиши мазкур шахсони масъул ба таври доимӣ, на кам аз як маротиба давоми ҳар даҳрӯза ба корхонаю ташкилотҳои нақлиётии вобастагардида ташриф оварда, тибқи талаботи замимаи 8-и Дастурамал оид ба назорати техникии БДА ВКД Ҷумҳурии Тоҷикистон парвандаҳои назоратӣ оғоз ва маълумотҳои зарурӣ ҷамъ оварда, фаъолияти корхонаҳоро зери назорати қатъӣ қарор медиҳанд.
  Тибқи талаботи банди 3-и Фармоиш аз ҷониби кормандони ба ширкатҳои мусофиркашонии ҷамъиятӣ вобасташуда робитаю ҳамкории зич бо роҳбарон, ҳайати муҳандисӣ-техникӣ ва ронандагони корхонаҳои нақлиётӣ ба роҳ монда шуда, оид ба пешгирии садамаҳои роҳу нақлиётӣ, ҳолати интизоми нақлиётии ронандагон, пешгирии ҳуқуқвайронкунӣ ва дигар кирдорҳои зиддиҳуқуқӣ, ҳамчунин ба таврӣ намунавӣ ба роҳ мондани муносибату муоширати ронандагон бо мизоҷон чорабинӣ ва дигар корҳои тарғиботиву ташвиқотӣ ба роҳ монда мешавад.
  Илова бар ин, дар асоси талаботи банди 3-и Фармоиш барои пешгирии содиршавии садамаҳои роҳу нақлиётӣ аз ҷониби ронандагони воситаҳои нақлиёти мусофиркашон ва пешгирии ҳуқуқвайронкуниҳои маъмурӣ кормандони ба ширкатҳои нақлиёти мусофиркашони ҷамъиятӣ вобасташуда шахсан масъул буда, дар сурати рух додани чунин ҳодисаҳо нисбати масъулин (кормандони вобастагардида) ҷазоҳои сахти интизомӣ татбиқ карда мешаванд.

Бонки Рушди Осиё тасмим гирифтааст барои барқароркунии Системаи энергетики Ҷумҳурии Тоҷикистон бо Системаи Осиёи Марказии энергетикӣ ба воситаи барқарорсозии системаи мазкур бо кишвари Ӯзбекистон $35 миллион ҷудо намояд.
Чуноне ки ба мухбири СССР дар намояндагии бонки БРО дар ҶТ хабар доданд, ин амал барои харидуфурӯши қувваи барқ дар минтақа шароити лозима фароҳам оварда, самаранок истифодаи шудани он дар байни кишварҳои Осиёи Марказӣ, хосса ЦАРЭС- Ҳамкории минтақавии иқтисодии Осиёи Марказӣ мусоидат хоҳад кард.
Бояд хотиррасон шуд, ки самаранокии ин система аз 9.11.2009 пас аз Системаи ягонаи энергетики минтақа баромадани системаи энергетии Ҷумҳурии Ӯзбекистон коҳиш ёфта, ҳоло бо роҳандозии ин лоиҳа умед аст, ки фаъолияти он дубора ба роҳ монда шуда, барои содироти нерӯи барқ аз минтақа ба кишварҳои дигар фоидаовар хоҳад шуд.

СССР

Вазифаи зиёии замона дар боби шоҳкориҳои санъатии роҳбару бинокорони барӯмандони имрӯзаи Меҳан, номбардорӣ ба иҷроиши корзори Роғун ва аҳди 8 сол пеш кардаи онҳост. Истеъдоди баланди гуруҳе аз забардастони НОБ-и Роғун шарафу истиқлолияти истеҳсоли барқи Тоҷикистонро ба марҳалаи нави саъодат расонид. Нуктаи ҷолиби таваҷҷуҳ ин аст, ки  чархаи аввали НОБ-ро беист, доимо дар гардиш оварда,  ҷомеъаро ба сӯйи зафарҳои тозаи иқтисодиву иҷтимой ҳаракат хоҳем дод. Мардуми муҳтарами тоҷик нурро полида, ба зинаи баланди некуаҳволии замонавӣ хоҳанд расид. Акнун шуҳрати истиқлолияти барқӣ барои мо Тоҷикон хизмат хоҳад кард. Бо  забони неруманди зебоӣ, ҳамаи бинокорон ва ба хусус ба раҳбари давлат, муҳтарам Эмомалӣ Раҳмон изҳори ташаккур дорам.
Давлате дорам, ки сад мулки дигар пазмони ӯст,
Раҳбаре дорам, ки сад шоҳи дигар паймони ӯст.

Нисори Роғун
Эй халқ, ба эътибори Роғун,
Бархез, ба корзори Роғун!
Миннаткаши нокасон набошем,
То дар ғами рӯзгори Роғун.
Аз бори матонат аст боло,
То арш сари вақори Роғун
Бо тоби зулол метаровад,
Селобаи беқарори Роғун.
Шӯраш ҳама бо фиғон физояд,
Хонад ҳамаро ба ори Роғун.
Бояст гузошт саҳми мардӣ,
Бо даъвати нангу кори Роғун.
Аз гардиши ақл гардиши чарх,
Орад сари ифтихори Роғун.
Бояд, ки гирифт нурполо,
Нурофари обшори Роғун.
Равшангари иқлими амонист,
Имрӯз зи диву пори Роғун.
Ин манбаъи нури Лоязолист,
Бояст шудан нисори Роғун!    

Нақди Роғун
Хоҳам, эй кӯҳ, туро садди гирифтор кунам,
Ки ба ин рӯди равон соғари саршор кунам.
Роҳи дарё ҳама бандам, ки кунам баҳри дамон,
Хокро дар раҳи он банд ба зинҳор кунам.
Нақди Роғун барам аз ҷилваи обаш ба сафо,
Нури он баркашаму мулки худ анвор кунам.
Раъдро дар бадали барқ фидояш созам,
Барқро бар сари ин халқ гуҳарбор кунам.
Ба нисоре, ки зи обаш расад ин миллатро,
Ҷонфишон гардаму нураш ҳама ансор кунам.
Дасти имдоди амон мерасад аз Раҳбари мо,
Меҳри дилро ҳама иқдоми мададгор кунам.
                          
Роғун, Роғун
Эй халқи ҷаҳон, ҳиммати мардон дорем,
                    бозуи матин!
Аз хурду калони даҳр меҳмон дорем,
                    бикшода ҷабин!
Мо чархи гарони давр гардон созем,
                    ҳайрон нашавед!
Роғун созем, ҷаҳон чароғон дорем,
                    паҳнои замин!


Роғун, Роғун, ба шӯру исён Роғун!
                                       Эй рӯди сафо!
Эй аз ту шарори нур ояд афзун,
                                           Эй кони вафо!
Мо аз ту макони худ мунаввар созем,
                                              Ин аст маром!
Сархам нашавем ба пеши аъдои забун,
                                             Не бими ҷафо!


Роғун, Роғун, туро ба ҷон месозем,
                                             бо тобу тавон!
Бо ҳиммати руҳу бо тавон месозем,
                                             мо пиру ҷавон!
Ҳар кас, ки бубинад, даҳан боз кунад,
                                             ҳайрон, ҳайрон!
Мо НОБ-и туро ба ҷовидон месозем,
                                                  Эй оби равон!            
   
Куҳкан
Халқи ман, худсозӣ инак, ёд мебояд гирифт,
Теша бар каф, пешаи Фарҳод мебояд гирифт.
Куҳро бояд фуруд овард инак пеши руд,
Садди дарё монда, худро род мебояд гирифт.
Мулкро бояд чароғон кард аз нуру зиё,
Бигзар аз ғафлат, раҳи бунёд мебояд гирифт.
Сохтан бояст Роғунро ба ҳукми Мири Ҳақ(қ),
Пушти Эмоми замон эҷод мебояд гирифт.
Мушти хок афган, бувад ин панди «аз мӯре мадад!»
Хез бар по, то раҳи иршод мебояд гирифт.
Пушти сар мегардад охир мушкили марди Худо,
Тоҷико, номус аз аҷдод мебояд гирифт!
            
Рӯди Вахш
Рӯди Вахш аст, ки аз байни камар меояд,
Саркаши рамзада бо шуру шарар меояд.
Сели обаш ба фиғон аст ба паҳнои дара,
Тезрав, навҳа ба лаб, тундгузар меояд.
Сарвату моли диёр аст ба обаш рахшон,
Симу зар дар бағалаш, дурру гуҳар меояд.
Чашми душман ҳамагӣ танг шавад аз нураш,
Ки ҳасуд аст, чунин тангнигар меояд.
Дар ҷилояш ба сафо сурати анвори Худо,
Ба вафову карами аҳли башар меояд.
Тоҷикистони маро аз дами НОБ-аш инак,
Бишнав, эй тангназар, сози зафар меояд!
 
   
Роғун офаридем

Ба ҳиммат НОБ-и Роғун офаридем,
Ба чархи тоби гардун офаридем.
Ба оби Вахш руҳи тоза додем,
Зи тобаш ранги гулгун офаридем.
Зи хоку санг карда садди роҳаш,
Ба роҳаш банди афсун офаридем.
Барои халқ кори хайр кардем,
Барои ақл мафтун офаридем.
Ҷалоли эътибори шодкомӣ,
Ба қасди табъи маҳзун офаридем.
Шавад, то шоми мардум рӯзи равшан,
Чароғон кохи мамнун офаридем.


Шаршара
Шояд, ки шунидӣ, чӣ садо шаршара дорад?
Шояд, ки ту дидӣ, чӣ сафо шаршара дорад?
Дар ҳар нафасаш савти хуши оби равонаш,
Аз ҳар нафаси умр наво шаршара дорад.
Шорад ба замин аз назари авҷ расида,
Дар манзари дидан чӣ намо шаршара дорад.
Аз тантанаи бахт ба оҳанг физояд,
Чун мӯй, ки дар дасти сабо шаршара дорад.
Ё Раб, чӣ наку мерасад овози баландаш,
Боланда ба ҳар нағма баҳо шаршара дорад.
Дар дил фараҳ ояд зи навояш, ки шунидам,
Овози хуш аз кӯйи Худо шаршара дорад.


Водопад
Ты слышал, как шумливо бурлит водопад?
Ты видал, как на солнце горит водопад?
В каждом вдохе – вся нежность текущей воды,
Каждый вздох с этой музыкой слит, водопад.
Без оглядки на землю летит с высоты…
О, как радует око твой вид, водопад!
Словно волос трепещет у ветра в руках,
Вечно музыку счастья струит водопад.
Этот звон беспрестанный и добр и могуч.
Ликовать, заставляя, гремит водопад.
От услышанной музыки сердце дрожит,
Так Творцом одарён, даровит водопад.
        
Народ – горец
Создать себя, как мир творят, пора учиться,
Тому, что мог творить Фархад, пора учиться.
Перед бушующей рекой срывая горы,
Плотиной делать камнепад пора учиться.
Весь, озаряя горный край потоком света,
Одолевать ряды преград пора учиться.
Рогун громадный созидать по Всевышней воле,
Творить быстрей, чем дни летят, пора учиться.
Не мелкий муравьиный труд – твоё призванье,
Путь проломи средь горных гряд, пора учиться.
Всем нашим трудностям конец придёт однажды.
У славных предков, о, мой брат, пора учиться.

Вахш
Вахш меж гор протекает, не зная преград,
С гулким грохотом тяжкие волны кипят.
Вечно эхо стремнины в ущельях гудит
И сливает с голосом снежных громад.
Все сокровища края – в сверкании вод,
Охвативших несметного золота клад.
Злятся недруги, щурясь от этих лучей,
И от зависти узким становится взгляд.
В этом блеске – само излученье Творца,
Здесь и щедрость, которой народ мой богат.
Что ж, ты слышишь завистник, скосивший глаза:
В край таджиков победные вести летят!

Строим Рогун
Мы великий Рогун всей душой создаём,
Светоч мы для Земли - мировой создаём.
Вахшу отдали духа высокий порыв,
Здесь мы радуги блеск огневой создаём.
Вот, плотину творя из песка и камней,
Это чудо для жизни живой создаём.
Радость светлую, горестям всем вопреки,
Мы в труде, что прославлен молвой, создаём.
В этих ярких лучах ночь светлеет, как день.
Храм лучистый любви, праздник свой создаём!

Дарение Рогуна
 О, народ, наша честь, наша слава – Рогун.
Встань! Создай из камней рекостава Рогун!
Что попрёки нам недругов неутомимых!
Пусть изведает прочность состава Рогун!
Честь – основа всего, что на свете высоко,
Он высок, он сурового нрава, Рогун.
Так прозрачна вода, но не сдержишь стремнины.
Протекает, как бурная лава, Рогун.
Суету позабудем, всю мелкость отринем,
Чтоб тобою гордилась держава, Рогун.
О, недаром вращается эта планета,
Встанет в блеске под грохот бурава Рогун.
Мы лучи соберём, сбережём этот светоч,
Чтоб над миром сиял златоглавой Рогун.
От Всевышнего этот источник сиянья…
Жизнь отдать, чтоб вставал величаво Рогун!

Рогунская ГЭС
Плотину из тебя, гора, хочу я сотворить,
Впустую плещущий фонтан в поток преобразить.
Всё невозможно досель, возможным сделать вдруг
И все речные рукава в сплошное море слить.
Рогуна воны высоко над руслом вознести,
Энергией весь отчий край насытить, озарить.
Вселенную пересоздать и радуги зажечь,
Извлечь энергию грозы, её умерив прыть.
И ничего не пожалеть и всё своё отдать,
Чтоб заблестела жизнь, как луч, как золотая нить.
Коль свыше помощи рука протянута тебе,
Любовью жертвовать не жаль, чтоб только победить.

 Рогун, Рогун
Честью дорожит народ, волен и крылат,
ясен путь побед!
Погляди, у нас в гостях нынче стар и млад –
лиц прекрасней нет.
Дней грядущих колесо мы запустим, брат!
В беге этих лет
Мы построим наш Рогун, жизнь пойдёт на лад,
всюду будет свет!

О, Рогун, Рогун!  Гремит голос  твой, Рогун!
Чистая река!
От тебя всё ярче свет и кипит бурун…
Вера велика!
Мы тобою озарим все свои дома.
И крепка рука,
Недруг нас не усмирит, расточится тьма –
впереди века.

О, Рогун, Рогун!  С душой выстроим тебя,
с мощью всей земли,
С честью, с пылкостью святой выстроим тебя…
Стар и млад пришли!
Глянет на тебя сосед и разинет рот:
«Чудо, дивный сон!»
Будь, бегущая река, вечной, как народ!
О, поток времен!

Бо камоли эҳтиром
ва арзи сипос,
Шамсиддин Муқим,
шаҳри Москва,
14 ноябри соли 2018

Шояд камтар аз 1% мардум бовар дошт, ки НБО Роғун бунёд меёбад. Аммо Президенти кишвар, мӯҳтарам Эмомалӣ Раҳмон онро ба кор даровард. Мо Метавонем!!!

Салом, СССР! «Билетфурӯшӣ фронти зарбдор!» ном мақолаи Холмурод Сафарзодаро дар газетаи СССР (№42(527), 18.10.2018) хондам. Муаллиф солҳои 1970-ро ёдрас шудааст, ки донишҷӯёни он давра бо завқи баланд ба театру кино мерафтанд, китобу рӯзнома мехонданд. Бо сабаби ҷанги шаҳрвандӣ то ба имрӯз он шавқу завқи мардум коста гардидааст. Ба гуфти муаллиф, «агар ба ихтиёри мардум монед, касе барои театру кино билет намехарад». Аз ин рӯ пешниҳод кардааст, ки бо зӯрӣ бошад ҳам, ба хонандагону донишҷӯён билети театру кино фурӯхта шавад. Ҳол он ки безӯрӣ ҳам хонандагону донишҷӯён аз пулғундориву пулситониҳо ба дод омаданд. «Аввал иқтисодиёт баъд сиёсат» гуфтаанд. Бигзор барои ғизои маънавӣ гирифтану баланд бардоштани маърифатнокии хонандагону донишҷӯён билет фурӯхта шавад, аммо на ба таври маҷбуриву таҳдиду таҳқир ва зӯриву фишор. Танҳо тариқи фаҳмондадиҳӣ, ташвиқу тарғиб ва ҳавасмандкунӣ завқи мардумро бедор кардан мумкин асту халос!

Обуна…мисли облава шудааст!
Ҳар фарди солими ҷомеаи ҳуқуқбунёд ҳаққу ҳуқуқ дорад, ки дар баробари ғизои моддӣ барои ғизои маънавӣ бардоштан мувофиқи хоҳиш ва имконият ба ин ё он рӯзнома обуна шавад. Аммо имрӯз обуна низ барои пурра намудани «план» иҷборӣ шудааст. Шахси обунакунонидашуда сари вақт рӯзнома мегирад, ё не, мехонад ё не, касеро парво нест. Чаро дар хариди рӯзномаву маҷаллаҳои хусусӣ «озод» касеро маҷбур намекунанд, ҳол он ки ҳар шумораи онҳоро муштариён бесаброна интизоранд?
 Ҳамин тариқ, дар боби китоб низ ҳамин мушкилӣ ба назар мерасад, яъне «иҷборӣ». Китобҳои навқаламони худрӯйро иҷборан ба мардум бо нархи гарон фурӯхтем, вале дар ҷумҳурӣ садҳо китобхонаҳои хурду бузурги боҳашамат мавҷуд буда, дар онҳо шумораи беадади китобу китобчаҳои хонданибоб маҳфузанду касе ҳатто варақ ҳам намезанад. Ҷавононро иҷборан ба хизмати ҳарбӣ бурдем, вале калимаи «облава» омада вирди забонҳо шуд. Мардумро иҷборан ба рӯзномаву маҷаллаҳо обуна кардем, ба истиснои рӯзномаву маҷаллаҳои «озод», зеро онҳо иҷборӣ нестанд. Ба хотири иҷборан тарғиб кардани манъи тамошои филмҳои туркӣ, мардум туркгаро шуда истодаанд.
Меҳру муҳаббат, ватандӯстию ҳисси баланди миллӣ доштан на дар забон, балки дар қалб бошад. Он вақт ба ҳар муваффақият ноил хоҳем гашт. Аз ин рӯ, мақомотҳои иҷроияи ҳокимияти давлатии шаҳру ноҳияҳоро зарур аст, ки барои баланд бардоштани сатҳи маърифату саводнокӣ ва беҳтар гардонидани вазъи иттилоотӣ ҳама тадбирҳои муҳимро чораандешӣ намоянд.

Табаралӣ Авсақолов,
узви Ихвон-ал-СССР, н.Фархор