Зишт дар силки накӯён менамояд зишттар,
Пои товус аз пари товус расво мешавад!!!
Ростӣ, ҳар гоҳе қуттии ТВ мекушоям бо 1 манзараи басо шигифтангез дилбазан вар мехӯрам: Сурудҳои патриотӣ-миллӣ-ватанхоҳӣ… Не, наёфтед Ман зидди чунин таронаву сурудҳо нестам. Худо нигаҳ дорад. Рӯиҳамрафта, хонандаи некбин медонад, ки СССР солҳо баҳс мекард, ки чунин сурудҳо каманд дар ҷамъияти мо. Оре, кам буданд, воқеан ҳам чанд сол пеш. Эҳ, кош зиёд намешуданд!!! Аз барои савоб, имрӯз чунон пур шудаанд, ки ҳисобаш гум. Акнун бар тибқи масали мардумӣ «кар ҳам мезанаду кӯр ҳам, пасмонда кулӯх ҳам!».
Ҳой мардум!!! Суруди патриотӣ, ватанхоҳӣ, миллатпарастиро бояд нафаре хонад, ки воқеан патриот асту мардум инро медонад! Ман маъзарат мехоҳам, аммо вақте нафаре бангиву ҳангиву майзада ва фаҳшо (Тоҷикистон бузург нест ва халқ ҳама ҳофизу сарояндагонро медонад, ки бо чӣ корҳо банданд!!!) дар бораи Миллату Ватан месарояд, магар ҷои айбу шарм нест?
Хизматгурез дар бораи Армия мехонад! Бонуе, ки ба гуфтаи Суҳробшоҳи Фаррухшоҳ, миллиард шавҳари афғону ируниву ҳиндӣ кардааст, роҷеъ ба иффати зани Тоҷику бангие аз меҳанпарастӣ…нохун мезанад. Мантиқ куҷост? Дар даврони шӯравӣ, фарзи мисол, ба зафарчаву фирӯзаҳои номеналӣ, иҷоза мешуд, ки суруди ватанпарастӣ-патриотӣ хонанд? Бештар аз ин, ҳатто ин корро ба Одина Ҳошиму Зафар Нозиму Ҷӯрабек Муродови нотакрор бовар намекарданд. Зеро ҳар кас мавқеъи худро дошт: “Қадри зар заргар бидонад, қадри гавҳар гавҳарӣ!!!”
Аҳмад Бобоқулов «Республикаи ман»-ро мехонд, на каси дигар. Суруди «Иди Зафар муборак» бахшида ба ғалабаи Тоҷикон дар Ҷанги Бузурги Ватанӣ бар зидди фашизми гитлериро, ки дар 1 шаб Зиёдулло Шаҳидӣ оҳанг баста буд, Шоиста Муллоҷоноваи нозанин хонд. Магар онҳо наметавонистанд, ба ситорачаи «первой попавшей» ин сурудро бовар кунанд? На-ме-та-во-нис-танд! Зеро пагоҳ ҳатман дар «красный ковёр» чухт мешуданд! Ва ё дар хотир доред, суруди беҳтарини ба иффати бонуи Тоҷик бахшидашудаи триои миллӣ-Нуқра Раҳматова, Улфатмо Мамадамбарова, Майсара Дилдороваро?…
Гулдухтарони Тоҷик,
Рӯҳи равони Тоҷик,
Ороми ҷони Тоҷик,
Дар хонадони Тоҷик…
Ин Гимни иффати зан-модари Тоҷик барои тамомии 15 республикаи СССР буд… А, имрӯз чӣ? Имрӯз қатағанбачча мехонанду ҳинди-бой-френд ва фардо Ватан! Миллат!! Тоҷикистон!!!
Кори ҳар буз нест хирман кӯфтан,
Гови нар мебояду дору расан!!!
Рӯиҳамрафта, тасаввур мекунед, ки Алла Пугачёваи прима ва Филипп Киркорови беҳамто «Россия»-ву «Родина»-ву «Великий Русь» хонанд? Инҳо ситораҳои баландтарин ва дастнорастарини осмони ҳунаранд, вале чун русҳо мисли мо фарҳанги мусиқаи сар-сарӣ надоранд, иҷозат нест, ки хонанд! Суруди меҳанпарастиро Лев Лешенко, Газманов, гурӯҳи «Любэ»… мехонанд. Ин нон ва ҳаққи ишон аст!
Аз сӯи дигар чунин «сурудҳои бозоргир» онқадар ситорачаҳои моро саргарм кардаанд, ки дигар шунавидани таронаҳои ошиқӣ, мавсимӣ (баҳорона, барфу боронӣ…), наврӯзӣ, тарбиявӣ тамоман гум шудаанд. Ишқро аз расонаҳои электронии мо рондаанд. Суруд ин танҳо пафоси дурӯғин нест. Суруд ин тарбияти ошиқон, навхонадорон, муттакои оила низ ҳаст. Кӯдак чӣ кор мекунад рӯзи дароз таронаҳои патриотиро??? Ба кӯдак суруди кӯдакона хонед, ба ҷавон тарбиявӣ, ба навболиғон ошиқона, ба ҷавонон мардонагӣ, ба гулдухтарон иффатпарастӣ, ба пиронсолон наъту муноҷот. Куҷо равонае(м)д?... Вақте сароянда Ватан, Меҳан, Миллат мегӯяду даҳҳо раққоса почакзанону китфшиканону чашмуабрӯпаррон мерақсанд, малеҳтар гӯям, хандаи кас меояд, агар гиряаш наомад…
Мо Метавонем!

   Масъулини ҳукумати н.Вахш мегӯянд, ки барои гирифтани посух ба суолҳои худ хабарнигорон минбаъд бояд аз ҷойи кор маълумотнома-справка биёранд. Дар ин бора муовини аввали раиси н.Вахш Саидбек Абдуллозода рӯзи 11.02.2019 зимни нишасти матбуотӣ дар ҳузури хабарнигорон таъкид кард.
  Худи раиси ноҳия Шарбатулло Азизулло дар нишасти матбуотӣ ширкат накарда, ба ҷойи раис муовини аввалаш нишасти матбуотиро баргузор намуд. Ӯ нахуст баромад карда, тӯли 35 дақиқа маърӯза хонд ва бо ин сабаб барои саволу ҷавоб бо журналистон вақти кам ҷудо карда шуд.
   Дар рафти нишаст хабарнигорон изҳор намуданд, ки дар баъзе ҳолатҳо гирифтани посух ва маълумот аз МИҲД н.Вахш хеле мушкил мешавад, вале Саидбек Абдуллозода дар ҷавоб таъкид намуд, ки минбаъд намояндагони воситаҳои ахбори омма барои дарёфт кардани посух ба саволҳои худ бояд аз ҷойи кор маълумотнома пешниҳод намоянд…
   Ба маълумоти роҳбарони шаҳру ноҳияҳо мерасонем, ки тибқи санадҳои меъёрию ҳуқуқии ҶТ дар соҳаи ВАО, хосса Қонуни ҶТ «Дар бораи матбуот ва дигар воситаҳои ахбори омма» гуфта шудааст, ки матбуоти даврӣ ва дигар воситаҳои ахбори омма дар Тоҷикистон озоданд. Ҳама гуна поймол кардани озодии матбуоти даврӣ ва дигар воситаҳои ахбори омма аз ҷониби шахс, шахсони мансабдори мақомоти давлатӣ, ҷамъиятӣ, аз ҷумла дахолат кардан ба фаъолият касбии редаксияи ВАО, ғайриқонунӣ боздоштан ва ё қатъ намудани фаъолияти он тибқи қонунгузорӣ ба ҷавобгарӣ кашида мешаванд.

Баҳодур Уроқов, СССР, вилояти Хатлон

   Соли 2018 дар ҷумҳурӣ 21 ҳазору 957 ҷиноят аз тарафи мақомотҳои ҳифзи ҳуқуқ ба ҳисоб гирифта шуда, аз ин ҳисоб 14 ҳазору 725 адад аз тарафи мақомоти корҳои дохилӣ ошкор карда шудааст. Аз ин шумора 86 ҳолат одамкушӣ ва сӯиқасд ба он, 149-расонидани зарари вазнин ба саломатӣ, 42-таҷовуз ба номус, 37-роҳзанӣ, 37-савдои одамон, 171-ғоратгарӣ, 1090-авбошӣ, 3161-қаллобӣ, 77-ҳолати гардиши ғайриқонунии силоҳ, 55 ҳолат-ҷиноят бо истифодаи силоҳ, 5078 ҳолати дуздӣ ва 668 ҳолати гардиши ғайриқонунии воситаҳои нашъадор мебошанд. Дар ин бора рӯзи 14.02.2019 зимни нишасти матбуотӣ Раҳимзода Рамазон Ҳамро, вазири корҳои дохилии ҶТ ба журналистон хабар дод.
   Бино ба иттилои вазир, дар давоми соли 2018 аз ҷониби ҷузъу томҳои ВКД 13 гурӯҳи муташаккили ҷиноятӣ дар ҳайати 65 нафар дар содир намудани 71 ҷиноят муайан ва дастгир шуда, 873 ҷинояти хусусияти террористӣ ва экстремистидошта ошкор ва ба ҳисоб гирифта шуд. Дар натиҷаи чораандешӣ 298 нафар аъзоёни ташкилоти террористӣ ва экстремистӣ дастгир карда шуданд.
Ҷамила Ҳусейнова, СССР

   Тибқи Нақшаи генералии ш.Турсунзода ба ҷойи бозори марказии шаҳр боғи фарҳангӣ-фароғатӣ бунёд гашта, бо ҳамин мақсад ин бозор дар ояндаи наздик тахриб хоҳад шуд. Дар ин бора ба намояндагони воситаҳои ахбори омма Абдулқодир Вализода, раиси ш.Турсунзода рӯзи 12.02.2019 зимни нишасти матбуотӣ хабар дод.
   Вобаста ба вазъи нороҳаткунандаи санитариву эпидемиологии ин бозор, ки аз ҷониби хабарнигори ҳафтаномаи СССР ба миён гузошта шуд, Абдулқодир Вализода ба сохторҳои марбута дастур дод, ки бори дигар ин проблемаро бардошта, масъулонро водор созанд, ки аз пайи тоза кардани бозор шаванд.

Ҷамилаи Мақсуд, СССР

Имрӯз дар шаҳри Исфара Форуми соҳибкорон таҳти унвони "Саҳми соҳибкорӣ ва сармоягузорӣ дар рушди иқтисодию иҷтимоӣ ва пешрафти ҷомеа" ба кори худ шуруъ кард. Дар он бештар аз 300 соҳибкорони ватанӣ ва бурунмарзии Исфара ширкат варзида, мақсад густариш бахшидани ҳамкории мақомоти давлатӣ бо бахши хусусӣ, ҷалби таваҷҷуҳи соҳибкорон ба раванди созандагию бунёдкорӣ, баланд бардоштани сатҳи дониши молиявии онҳост.

(Памфлет)

Наздикони Рустамҷон Ҳотамов, як нафар сокини шаҳри Панҷакент, аз ҳукми додгоҳ, ки ӯро бо моддаи 212, қисми 1 “Вайрон кардани қоидаҳои ҳаракатӣ роҳ ва истифодаи воситаҳои нақлиёт” ба 6 моҳ суд намуд, изҳори норозигӣ карда, гуфтанд, ки мурофиа ноадолатона гузашт ва суд дар чанд маврид сабукиҳоро истисно намуд. Пайвандони Ҳотамов мегӯянд, аввалан суд ба номи ӯ даъватнома нафиристодааст, балки 1 рӯз пеш аз мурофиа, бегоҳии санаи 11 феврал, соати тақрибан 19:00, ки вақти корӣ гузашта буд, бо телефон занг зада огоҳӣ доданд, ки пагоҳ бояд ба суд равем. Магар ҳамин амали суд дуруст аст? – мегӯянд пайвандони Рустам. Ба андешаи Дилноза Соҳибова, ҳамсари Рустам, ҳамчунин дар мурофиа талаби ҷабрдида-Зӯҳро Сатторова, ки мегуфт ягон даъво надораду шавҳараш пурра зарари расондаашро ҷуброн кардааст, аз тарафи судя Мақсудӣ Фирӯзҷон ба инобат гирифта нашудааст.
Хешовандони Ҳотамов мегӯянд, ин ҳодиса барқасд сурат нагирифтааст ва ақалан бо таъин намудани ҷарима ӯро озод мекарданд, онҳо розӣ буданд. Зеро Рустамҷон як фарзанди ноболиғ дораду ҳамчунин гирифтори бемории асаб аст. Президенти кишвар ҳам борҳо гуфтаанд, ки мақсади гунаҳкорон танҳо ҳабс кардани онҳо нест, балки дар рӯҳияи инсондӯстӣ тарбия кардани эшон аст. Пайвандони Рустам мегӯянд, ӯ ягон маротиба ҷиноят накардааст ва барои аввалин бор он ҳам аз беэҳтиётӣ рух додани ҳодисаро ба инобат гирифта, суд мебоист ҷазои сабуктар аз ҳабсро татбиқ мекард.
Ҷабрдида Зӯҳро, ҳам дар сӯҳбат бо мо гуфт, ки баъди ҳодиса Рустам ӯро хост ба беморхона барад, вале ӯ худаш рад кард. Аммо бо ин вуҷуд ҳамаи хароҷоташро, ки танҳо дандонаш осеб дида буд, пардохтааст: “Ман сидқан мехоҳам, Рустам озод шавад, ягон даъво надорам. Рустам мисли дигарон, ки ҷиноят мекунад, зада фирор накардааст. Балки худаш маро аз замин хезонида бахшиш пурсид”.
Аслан як чизи дигар ҷониби ҷавобгарро нороҳат кардааст, ки чаро мақомоти милитсия баъди 2 моҳи ҳодиса ба таҳқиқи он машғул шуданд? Ҳол он ки касе дар ин бора шикоят накардааст. Хешовандони Рустамҷон айни ҳол аз болои ҳалномаи мазкур ба суди болоӣ шикояти кассатсионӣ оварда, умед бар он доранд, ки судҳои зинаи болоӣ адолатро барқарор мекунанд.

Хуршед Фозил,
СССР, Панҷакент